SHILLONG: Budbar salo a·dokni Cabinet tom·e chanchirimangenba, mitam niamrangko taridapna parakangan baksana taridapgimin adita niamrangkoba ra·chake on·angaha.
Buring bolgrimrangko ripinganio aro nirokanio State Forest Department aro Autonomous District Council-rangni nangrime kam ka·aniko mangrakbatatna gita a·dokni Cabinet, Meghalaya Forest Authority Act, 1991-ko taridapna ia tom·anio parakataha.
Ia niamko taridapanichi Meghalaya a·doko buring bolgrimrangko ripinganio aro nirok sandianio, bilo ong·enggiparang, salanti kam ka·anio tangka paisarangko jakkalna aro dolgnini gisepo nangrime kam ka·aniko namdapatna cholrangko on·gen ine Cabinet tom·a matchotani ja·man a·dokni Chief Minister Conrad K Sangma, kobor ra·timgiparangna parakataha.
“Ian chonbegipa taridapanisan ong·aigenchimoba, bilo ong·enggiparang, miksongako chu·sokatanio nambate kamrangko ka·na man·na gita ia niamko taridapaniara nangchongmotgipa ong·a,” ine Sangma aganaha.
Meghalaya sorkarini garirango biming segipa board-rangko jakkalna niam ra·gatanikoba ia tom·anio Cabinet ra·chakangaha.
“VIP-rangni dakbewalrangko jegalanirangnaba chinga adita salrangna skangan, sorkarini garirango siren, light aro uandakgipa cholrangko jakkalna dingtangmancha niamrangko ra·gataha aro iano pangchake Transport Department, kamni kri, garirango biming segipa board-rangko jakkalna bilko on·na gita gadangrangko seokmanaha,” ine Chief Minister aganaha.
“Ra·chakgimin niamo, sorkari, judiciary, administration aro seoka man·gipa gadangni official-rangko man·chapaha. Ia ja·kuko de·anichi a·doko sorkarini garirangko jakkalanio rongtalbatani, apsan ong·ani aro namgipa bewalko ja·rikna man·gen,” ineba ua aganaha.
Ia apsan salon a·dokni Cabinet, Motor Vehicles Tax, Passenger & Goods Tax aro Fitness Fees-o nangchakegipa dairangko watna aro komiatna gita One Time Settlement (OTS) scheme-koba ra·chakangaha.
“Batanggimin bilsirangonin, Motor Vehicle Tax, Goods & Passenger Tax aro Fitness Certificate-rangko renew ka·chipjani a·sel para salgipa bang·a garirangan grorang tang·dororoangaha. Ia dairangara a·bachengo bang·jagenchimoba, gamgija donchipani a·sel grorang tang·dororoangaha aro bang·a manderang, mongsongbate gari sale cha·enggipa manderangna ian neng·nikaniko ra·baani gita ong·aha,” ine Chief Minister janapatenba, iani giminsa aro gari sale cha·enggipa manderangara bang·batan a·doktangni manderangan ong·ani gimin sorkari, Fitness certificate renew ka·chipgijaparangni daiko 90%-chi watna aro MV Tax aro Goods & Passenger Tax gamchipgijagiparangni daiko 80%-chi watna tik ka·aha ine parakataha.
“Ia One Time Settlement scheme-ko ia 2026 bilsini August 31 tarikona man·gen aro ia scheme-ko ra·gatani miksonganiara, gari sale cha·enggipa manderangni bal-bojako komiate, apsan daken janggi tangpiltaia cholko on·anian ong·enga. Ia cholko ra·e, an·tangtangni bangki dongenggipa grorangko matchotatchina gari sale cha·enggipa manderangko aro gari nokgiparangko didiatenga,” ine Chief Minister parakataha.
