SHILLONG: Assam a·doko Uniform Civil Code (UCC) Bill-ko pass ka·angani ja·man, UCC-ni bidingo maming ja·kurangko de·na skangba niamrangko che·em che·em poraie nichengna nanggen ine a·dokni Chief Minister Conrad K Sangma parakataha.
Goa aro Uttarakhand a·dokrangni ja·man Assam a·dokba UCC-ko Budbar salo pass ka·angaha aro UCC-ko pass ka·giparangoni gittamgipa a·dok ong·ahachim. Indake ong·genchimoba Uttarakhand aro Assam a·dokrangde, UCC-ni ning·o Tribal-rangkode watchanggalskaaha.
Iani bidingo kobor ra·timgipa manderang baksa agangrikengon, ua skangoba apsankon aganaha aro da·oba UCC-ni niamrangko name poraie nichenggijade mamingkoba aganna man·jawa inen aganenga ine Chief Minister Conrad K Sangma parakataha. ‘Uniform Civil Code’ kattarangan namen apalbegipa kattarang ong·a aro name talate on·aniko nangchengenga ineba Sangma aganaha.
“Tribal-rangni daka rikanirangara namen dingtangani giminsa anga jajrengchakanirang donge a·bachengo ia UCC-ko jegalaha aro Meghalaya a·dokara me·chikrangko mongsongbatgipa ong·e ra·ani gimin ia niamko ja·mano gipin niamrangchi dingtangatna man·aigen,” ine Sangma aganaha.
Chief Minister-ni parakatani gitade, UCC-ni gimin skanggipa chanchirimchengani somoio, Tribal-rangni niam retirang aro jatni daka rikanirang nangchakeaniko man·gen ine bang·bata manderangni gisepon kenchakanirang ong·katahachim. Indake ong·genchimoba, Assam aro Uttarakhand a·dokrango, Tribal-rangkode UCC-oni watchanggalna tik ka·ahani gimin ian Tribal-rangna rang·speaniko ra·baani gita ong·aha ine Sangma aganaha.
UCC-ko ra·gatanio, Tribal-rangni bilrangko chel·chakna gita niamko donahani gimin jera ra·grikani bichongko bewalan dingtangataha ineba Chief Minister aganaha.
Indake ong·genchimoba, UCC-ni bidingo maming ja·kurangko de·na skangba Meghalaya a·dokde, skanggipa niamrangko name nichengesa ja·kurangko de·gen ineba Sangma parakataha.
Tribal-rangni daka rikani, mongsongbate Meghalaya a·doko me·chikrangko mongsonggipa ong·e ra·aniara namen dingtangmanchagipa ong·ani gimin UCC-ni bidingo maming ja·kuko de·na skangba niamrangko name nichenggen ine Sangma aganaha.
