Shillong-ni St Mary’s School-o Solar PV Plant-ko CM oprake on·anga

SHILLONG: Chief Minister’s Solar Mission-ni ning·o, Shillong songjinmani St Mary’s Higher Secondary School-o gital rikgipa 50 KW Solar Photovoltaic (PV) Plant-ko Mongolbar salo, a·dokni Chief Minister Conrad K Sangma, oprake on·angaha.
Ia solar plant-ko Meghalaya New & Renewable Energy Development Agency (MNREDA) jako ra·e tariaha aro ian Meghalaya a·dokni skulrango dal·batsranggipa solar power plant-rangoni damsa ong·enga.
Ia 50 KW ong·gipa solar PV plant-ko rikanio gong lak 50-mangni gita koros ong·aha aro ian ia skulna bijoliko on·anio bang·a namgnirangko on·na sienga.
Ia solar plant-ko a·bachengate on·anganio a·dokni Chief Minister, jinmana aganprakangengon, ong·telaigipa cholrangoniko man·gipa bil ba bijolini gamchatgipa ong·aniko janapangenba, ian a·gilsakni ding·a sin·a batrororaniko champenganioba dakchakani ong·a ine parakataha.
Ia solar plant-ko a·bachengate on·aniara, ong·telaigipa bilrangko jakkalna a·dok sorkarini kang·kare kam ka·aniko mesokani ong·enga ine janapatengon, iandakgipa kamrangko chu·sokatanio technology ba kolrangko ra·gataniosande pangchakaina man·ja ine Chief Minister aganaha.
CM Solar Mission-ni bidingo talataniko on·angskaengon, ia mission ba kamara, mingsanosan pangchakaigija dingtang dingtang cholrangchi kamko chu·sokgipa ong·atna dingtange tarigipa ong·a ine Chief Minister aganaha.
Ia Solar PV Plant-ko songe on·anio, ia skulna solar panel-rang baksana sal dim·ani somoirango ba bijoli dongjani somoirango bijoliko jakkalna man·na gita inverter aro battery-rangkoba on·aha.
CM Solar Mission-ni chu·sokgipa ong·engani gimin janapatengon, ia Mission-ni ning·o a·dokni dam 700-mangni gita skulrango 1.5 MW-na baten solar panel-rangko songe on·na man·aha aro bakan dam 1300 skulrangoba a·bachengatna sienga ine Chief Minister parakataha.
Bijoliko on·ani, jabol galani, chirangko sale on·ani, an·seng baljokaniko on·ani aro gama ge·ani kamrango chagrongna nanggipa neng·nikanirangko namatna gita chatro chatrirang aro gisik matsramgipa chadamberang, cholrangko bikotna man·na gita bakan Meghalaya sorkari, state level technology & innovation competition-ko ong·atanggen ineba ia tom·anio Chief Minister parakataha.
St Mary’s Higher Secondary School-ni kal·susaani program-rango dakchakanirangko on·na ku·rachakaniko on·angengon, kamtangtango bimchipgiparang ong·china, pangnan bamgiparang ong·china aro an·tangtangni man·enggipa cholrangna mittelpilgiparang ong·china gita Chief Minister, skulni chatrirangko ku·pattiangaha.
Ia tom·anio, Power Department-ni Commissioner & Secretary Dr Joram Beda-ba aganprakengon, ong·telaigipa cholrangoniko bikotgipa bijolirangni gamchatgipa ong·aniko janapangaha.
Iana skang, program-ko a·bachengatanio, St Mary’s Higher Secondary School-ni Principal, Sr Sonia Chacko, rimchaksoani kattarangko aganangengon, ia skulna solar power project-ko songe on·ahani gimin a·dokni Chief Minister aro Meghalaya sorkariko mittelpilangaha.