AMPATI: South West Garo Hills a·jao ‘Public Finance: Concepts & Rules’-ni bidingo sorkari official-rangna skie on·na gita June 2 tarikoni a·bachenge June 4 tarikona, dingtangmancha training program-ko Ampati-ni DRDA Hall-o ong·atenga.
Sorkarini kamrangko ka·anio, tangka paisarangko jakkalani aro hisaprangko rakkiani niamrangni gimin sorkari official-rangna talate on·na gita ia training program-ko Shillong-ni Meghalaya Administrative Training Institute (MATI) ong·atenga.
Ia training program-ko MATI-ni ning·o donggipa Management Development Cell-ni Assistant Director W Rynjah dakdilenga aro ia program-o Meghalaya sorkarini Financial Adviser PW Dkhar, sorkari official-rangna skie on·enga.
Ia training program-ko a·bachengatani salo, South West Garo Hills a·jani sorkari official-rangna, tangka paisa aro hisaprangko rakkianio nangchakegipa dingtang dingtang subject, jekai Fundamental Rules and Subsidiary Rules (FR&SR), Delegation of Financial Powers (DFP) Rules, National Pension System (NPS), Treasury Rules, Budget Matters, aro General Provident Fund (GPF) Rules gita dakgipa subject-rangni gimin agan-skie on·angaha.
Ia salgittamna ong·atenggipa training program-o Meghalaya Financial Rules, Travelling Allowance (TA) Rules aro uandakgipa subject-rangni giminba sorkari official-rangna skie on·anggen.
