SHILLONG: Union Home Minister Amit Shah-ni roadmap ba kamrangko ka·na tarisamsoanirangko mesoke on·angani ja·man, salgro salaramni damchet a·dokrangan mikkangchi India a·songni ‘Ashtalakshmi’ ong·gen ine Bristibar salo, North Eastern Council (NEC)-ni chang 73-gipa Plenary Session-ko ong·atanio, Development of North Eastern Region (DoNER)-ni Union Minister Jyotiraditya M Scindia parakataha.
2047 bilsini gisepo a·songko ‘Viksit Bharat’ ong·atna kamrangko ka·anio, salgro salaram a·dokrangan mongsonggipa bakrang ong·gen ineba ua aganaha.
Re·baenggipa bilsiona, Union Home Minister Amit Shah, NEC aro salgro salaramni damchet a·dokrangna, dingtang dingtang program-rangko tarisomanaha ineba Union Minister aganaha.
“Re·baenggipa ja 12-na Union Home Minister, NEC aro an·chingni damchet a·dokrangna ramarangko tarisomanaha. Da·o chinga uni ge·etanio pangchake kamrangko ka·na sienga,” ine Scindia aganaha.
A·songni Prime Minister Narendra Modi-ni ning·o, salgro salaramni damchet a·dokrang, ka·sinsin bilakbarorona man·engaha ineba DoNER Minister parakataha.
“Viksit Bharat 2027-na an·ching re·mikkangengon, ia damchet a·dokrangan India-ni ‘Ashtalakshmi’ ong·gen,” ine Scindia aganaha.
Salgro salaram jolrango ta·raken dal·roroaniko nikna man·engani gimin Union Minister, a·songni Prime Minister Narendra Modi-ni niksamsoe kam ka·aninaba mittele aganangaha.
“Prime Minister-ni niksamsoani ning·o salgro salaram jolni tang·doanganiara, salgro salaramni pilak kona noksikrangon economy-ni tang·dobataniko nikna man·aha,” ine ua aganaha.
DoNER Minister-ni parakatani gitade, 2047 bilsina nisamsoani gnang kamrangko ka·engon, salgro salaramni daitoan mongsonggipa ong·gen.
“2047 bilsio India a·song tang·dogimin a·song ong·ahaon, salgro salaram a·dokrangan ia Viksit Bharat 2047-ni mongsongbatgipa bak ong·gen,” ine Scindia aganaha.
