TURA: Chokpot Civil Sub-Division-ni ning·o donggipa dingtang dingtang biaprango bijoliko tik ong·e man·jaengani gimin aro bijoliko name man·jaengani a·sel poraienggipa chatro chatrirang neng·nikanirangko chagrongna nangtokengani gimin Bristibar salo, Chokpot jolni nangrimgimin NGO-rang, Tura-o donggipa MePDCL-ni Chief Engineer-ko grongenba, Chokpot jolrangna bijoliko nambate on·china didie memorandum-ko on·angjolaha ine u·iataha.
Chokpot NGO-rangni parakatani gitade, skang somoirangode Chokpot jolrangna, Tura line-kosa bijoli sale on·achim aro ua somoirangode Chokpot jolrango bijolini teng·aniba tik ong·kalachim indiba da·o Chokpot-ona bijoli line-ko Mokapara-oni Zikzak, Purakhasia, Dalu aro Ronggata-ni ja·mansa ra·angahani gimin indita chel·begipa biaponi bijoliko salbaani a·sel ia jolrango bijolini teng·anirang tik ong·jaenga.
“Chokpot jolrango da·o bijoli teng·ani tik ong·srangjani a·selan dingtang dingtang kamrangko ka·anio, mongsongbate da·o jadokni porikkarangna poraisona nangenggipa chatro chatrirang neng·nikanirangko chagrongna nangtokenga,” ine Chokpot jolni nangrimgimin NGO-rang, MePDCL-ni Chief Engineer-na sedoatgipa chittio parakataha.
Chokpot jolo lineman sakbongasan dongaia aro ia sakbonga lineman, indita dal·begipa biaprangko nirokanio, neng·nikanirangko chagrongna nangenga ineba NGO-rang parakatenba, Chokpot jolrangna lineman-rangko on·dapchina MePDCL-ko didiataha.
“Tura-o chinga MePDCL-ni Chief Engineer aro gipin dal·dalgipa officer-rangko gronge agangrikon, Chokpot jolna Tura Dobasipara-niko line watna Shillong-ni dal·batgipa official-rang baksa agangrikgen aro lineman-rangko on·dapna gitaba uamang chubata gadangni official-rang baksa agangrikgen ine chingna ku·rachakaniko on·ataha. Iana chinga dingtangmancha MePDCL-ni official-rangko mittelna ska,” ine Chokpot-ni nangrimgimin NGO-rang parakataha.
