CHOKPOT: India a·songni jakgitelaniko man·aoni bilsi 70 batpilahaoba aro Meghalaya a·dokko man·aoni bilsi 50 batpilengahaoba, South Garo Hills a·jani Chokpot jolrangode da·onan dam 32 songrang bijoliko man·tokkujae, songni nokni manderang neng·nikanirangko man·na nangkuenga ine kobor on·aha.
Adita bilsirangna skangsan, NPP-chi dilgipa gitcham sorkarini somoio, bijoli man·kugijagipa songrangna bijoliko sale on·na gita ma·mong sorkari, Saubhagya scheme-ko ra·gate on·ahachim indiba ia songrangde, ia scheme-ni namgnirangkoba man·rikpajaha.
Kobor on·timgipa manderangni u·iatani gitade, bijoliko man·kugijagipa songrang, South Garo Hills a·jani Chokpot C&RD Block-osan ong·ja indiba West Garo Hills, East Garo Hills aro North Garo Hills a·jani badiaba badiaba biaprangoba bijoliko man·kugijagipa songrang bewalan dongkuenga aro ian Garo Hills-ni ja·manchakaniko mesokani ong·enga.
Chokpot jolrango dam 32 songrang bijoliko man·kujaengani gimin Garo Students Union (GSU) Chokpot regional unit-ni president Jish Sangma, an·tangni suk ong·gijaniko parakatengon, ia songrango donggipa manderang, solar panel ba salni bilchi on·enggipa bijolirangosa pangchakna nangtokenga ine parakataha.
“Ia dam 32 songrangoni Kakija, Paromgre, Dorek Asim aro Chiringmagre songrangba bijoliko man·kugijagipa songrang ong·a. Ia songrango donggipa manderang, rama jal·langrang dongjani a·selba neng·nikanirangko man·ronga aro bijoli dongjani a·selba neng·nikanirangko man·batenga,” ine Sangma parakataha.
GSU president-ni parakatani gitade, bijoli man·kugijagipa songrangko uamang hisape nion, Chokpot-o donggipa MePGCL office-ni hisap baksa apsankon man·aha.
“Chingni hisape nianirang MePGCL-ni hisap baksa apsan ong·a aro songni bimingrangba apsan ong·a. Ia songrangona bijoliko sale on·na gita mai ja·kurangko de·enga ine sing·on, uamang ia songni bimingrangko head office-ona watataha ine aganahachim indiba da·alonan maming kamrang chu·sokkujaenga,” ine Sangma aganaha.
Ia pilakan department-ni simsakgijani a·selsa ong·enga ineba GSU Chokpot unit-ni president, suk ong·gijaniko parakataha.
