TURA: June 1 tarikoni 30 tarikona Khet Bachao Abhiyan campaign-ko ong·atengani gimin Sukrobar salo, West Garo Hills aro South Garo Hills a·jani Krishi Vigyan Kendra (KVK), training program-ko ong·atangan baksana World Environment Day-koba manijolangaha.
Ia program-ko West Garo Hills a·jani KVK, Aminda Rangsagre songo og·atangaha aro ia program-o soil health management baksana gama ge·anirango samrango pangchakaigijam ong·telaigipa a·salrangko jakkalani aro jo·ongrangko chel·chakani giminba KVK-ni official-rang, songni manderangna aro game ge·e cha·giparangna agan-talate on·angaha.
Ia program-ko ong·atanio, songni Nokma Wanson Ch Momin, ATMA-ni official-rang aro songoni sak 38 manderangba bak ra·angaha.
Apsan daken, ICAR-ATATI Zone-VII-ni ning·o South Garo Hills a·jani CAU-KVK-ba ia Khet Bachao Abhiyan campaign-ni program baksana World Environment Day-ko Sibbari Chambilgre songo aro KVK campus-o ong·atangaha.
Ia ‘Khet Bachao Abhiyan’ campaign-ko game ge·e cha·giparangna, an·tangtangni game ge·e man·gipa bosturangko chel·chakani, jo·ong aro sabisirangko name nirokani aro gama ge·anirango gital kolrangko jakkalani bidingo game ge·e cha·giparangna u·iatna aro talate on·na gita ong·atenga.
Ia ‘Khet Bachao Abhiyan’ campaign-ni ning·o South Garo Hills a·jani KVK, dam 40 songrango awareness program-rangko, field demonstration-rangko aro game ge·e cha·giparang baksa agangrikanirangchi komibeoba sak 4500 game ge·e cha·giparangna, gama ge·anirangko namdapatani bidingo talate on·enga.
Ia ‘Khet Bachao Abhiyan’ campaign-ko nambate chu·sokatna gita South Garo Hills a·jani KVK, Agriculture department, Horticulture department aro ATMA-ni official-rang baksa nangrime program-rangko ong·atenga.
Ia program-ko ong·atanio, World Environment Day-ko maniani bak gita KVK-ni official-rang, songni manderang baksa bite nanggipa bol chararangkoba ge·angaha.
