SHILLONG: Political-ni a·baode sakantini chanchianirang apsan ong·ja aro party-oni ong·kate katanide ramram ong·aia ine aganenba saksani ong·katachide party-o bak ong·tokengjok indake ong·ja ine party-ni gitcham vice-president Robertjune Kharjahrin-ni kam watani bidingo United Democratic Party (UDP) dilgipa aro Mawsynram MLA Olan Sing Suin Robibaro aganaha.
Party-ni gitcham dilgipa Kharjahrin-ni party-oni ong·katna miksonggipani bidingo aganengon, UDP-o maming bak ong·ani dongja aro jeko dakoba apsan krimkro chanchiesa jekoba dakenga ine Suin aganaha. UDP-o da·o da·odipet maming bak dakani dongja aro pilak mongsonggipa kamrangna ku·cholsan re·mikkangenga ineba ua agandapaha.
Rajya Sabha election-o NPP candidate James P. K. Sangma-na UPD-ni chakpana am·enggipani bidingo sing·anina aganchakengon, iani bidingo MDA parliamentary party-sa chanchie tik ka·aha aro ian darang political party-ni an·tangari chanchie tikka·gipa ong·ja ine Suin talataha.
James Sangma, Meghalaya Democratic Alliance (MDA)-ni candidate ong·a, aro darang party dolsanni susaatgipa ong·ja, ua agandapaha.
Suin indakeba aganaha je, UDP party-ko bilakatna gita ongipa ba an·pachakgipa gadangonin taribaengaha aro re·baenggipa antirango constituency, district aro state level-rango agangrikanirangko dakanggen.
Rajya Sabha seat-na MDA-ni gita seokgipa candidate James K Sangmana chakpaaniko on·na gita party-ni chanchiani gimin, party vice president Kharjahrin-ni UDP-ni Central Executive Committee aro uni party-o member ong·aoni ong·katna gita re·anggipa Butbaro kam watani chittiko on·ahachim.
Party-ni Central Executive Committee-ni namnikaniko am·chenggija, UPD legislator-rangni, MDA candidate James Sangmana chakpana ku·rachakani gimin ua suk ong·teljaha ine Kharjahrin, uni party president Metbah Lyngdoh aro general secretary Titosstarwell Chyne-na seatgipa chittio janapahachim.
Uamangni daka kamara, party-ni gamchataniko gimaatgen aro voter-rangni gisepoba jajaani sokbagen ineba ua aganaha.
Kharjahrin-ni ong·kata ja·man party-o bak ong·engjok inako UDP jegala
Date:
Share post:
