Chillipara songo chu·onga gita bijoli krongrangko songe on·china dabia

DALU: West Garo Hills, Dalu Block-ni ning·o donggipa Chellipara songo bijoli krongrangko chu·onga gita songe songe on·china Sub-division Officer, MePDCL Barengapara Branch-na lekka sedoan baksa songni-nokni chagrongenggipa neng·nikanirangni bidingo, 8-Amongpara GHADC constitutency-oni susanasienggipa TMC Candidate Sairill D Marak, songni Nokma Imbok M Marak aro songni nokni manderang baksa chanchirimangaha.
Sairil D Marak-ni koborna parakatani gitade, Chellipara songo batanggimin 2021 bilsio Rajiv Gandhi Rural Electrification Scheme (BPL)-ko man·ahachim. Indake ong·genchimoba songni manderangna chu·onga gita bijoli krongrangko songe aro tarie on·jaha. Uani bidingo, songni manderang changnichang office-ona re·ange agangrikgenchimoba Chelipara songna chu·sokate on·jaha, office-oni metter box-ko noko chatteke on·aha ine aganaha.
Iani bidingo office-ona re·ange badi ka·genchimoba office-oni wire aro bijoli salna jakkalgipa bosturangko on·atenba, songni manderangko an·tangtang tarie jakkalchina aro bolni krongrangko songe jakkalchinasa aganatahachim. Indake office-oni aganatako man·e aro nanggipa bosturangko man·ani gimin songni manderang bolko bijoli krong songe jakkalaha ineba koborna janapataha.
Unigisepon, uamangni bolko bijoli krong songe jakkalenggiparang da·alo namen gitchambeahani gimin maming naljokani gri ong·e kenchakna nanganirang batroroengaha ine janapatan baksa mainigimin Chillipara songnara silni bijoli krongrangko songe on·na man·ja ine Marak sing·doangaha.
Da·alo Chellipara songo bijoli jakkalgipa ge 63 nokdangrang donga aro ia nokdangrang bijoliko tangka game jakkaltokenga. Indakoba Chillipara songgimiko silni bijoli krong dot 25 rangsan dongaia, unagrede bolni krongrarasa ineba ua aganaha.
Unomitingo, kamrangko ta·raken niatgen aro bijoli krongrangko chu·onga gita songe on·gen ine MePDCL Barengapara Branch Sub-division officer-ko grongani somoio officer ku·chakataha aro Civil Sub-divisional Official-ba apsan daken biapona re·ange niegen ine ku·rachakatataha ine Sairill D Marak koborna aganaha.