Tura Medical College-o skigipani kamna dorgasto galgiparang komienga: Health Minister

SHILLONG: Tura Medical College-o skigipani kamna sorkari, advertisement ba u·iatanirangko on·manaha indiba kamna dorgasto galgiparang komienganian jajrengna nangani ong·enga ine Sukrobar salo, a·dokni Health Minister Wailadmiki Shylla parakataha.
Health Minister-ni parakatani gitade, Tura Medical College-na skigiparangko ra·na gita sorkari, advertisement-rangko on·engahachim indiba da·o dipet kamna gisiko nanggiparang komiengani gimin ian sorkarina jajrengna nangani ong·enga.
“Tura Medical College-o skigipani kamna gisiko nanggiparang komikuenga aro ian namen dukni ong·a. Indake ong·genchimoba ja·mano ia college-na skigiparangko chu·onga gita man·gen ine chinga ka·dongenga,” ine Shylla aganaha.
Tura Medical College-ko rikani bidingo janapatskaengon, college-ko rikani kamrangde da·o 90 percent-ni gita matchotaha ine Health Minister parakataha.
Kam ka·giparangko, mongsongbate skie on·giparangko chu·onga gita man·genchimode, Tura Medical College-koba re·baenggipa 2027 bilsionin kulie, course-rangko a·bachengna man·gnok ine adita salrangna skangsan Health Minister parakatahachim.
Tura Medical College-na qualify ong·gipa skigiparangko aro kam ka·giparangko man·na neng·ani ong·gen ine niksamsoani giminan ia medical college-ko public-private partnership (PPP) mode-o chalaina sorkari tik ka·chengahachim indiba iako dingtang dingtang dolrang aro a·doko songdongenggipa manderangba jegaltokahani gimin sorkari an·tangan college-ko chalaina tik ka·aha ineba ua aganaha.
Shillong Medical College-ni bidingo janapatskaengon, ia College-ko oprake on·na gita sorkari, a·songni Prime Minister Narendra Modi-ni tarik tik ka·e on·aniko sengkuenga ine Shylla parakataha.
Health Minister-ni aganani gitade, Shillong Medical College-ko Prime Minister-ni jakchi oprake on·na gita iana skangba tarikrangko tik ka·ahachim indiba ia tarikrangara, gipin program-rang baksa nangeahani gimin den·galpilna nangao ga·akaha.
Shillong Medical College-ko Prime Minister-ni jakchi oprake on·na da·o a·dok sorkari, gital tarikna sengkuenga ine janapatengon, bakan tarikko tik ka·enba, Shillong Medical College-ko PM-ni jakchi oprake on·na ka·dongenga ine a·dokni Health Minister parakataha.