SHILLONG: Sonibar salo State Convention Centre-o University of Science and Technology Meghalaya (USTM)-ni gita tom·aniko ong·atgipao Meghalaya Board of School Education (MBOSE)-ni gita porikka seatgipa SSLC aro HSSLC porikkao nambatgipa gadango chu·sokgipa sak 86-ko mande ra·angaha.
Uamangni poraianio chu·sokanina chatro chatrirangko mande ra·an baksana certificate, memento-rangko aro tangka lak 5-ko on·angaha.
Programme-o Meghalaya High Court-ni Chief Justice Revati Mohite Dere, The Shillong Times-ni Managing Diretor aro Padma Shri man·gipa Dr Manas Chaudhuri, aro Meghalaya-ni gitcham Cabinet Minister aro Nongpoh MLA Mayralborn Syiem, Meghalaya Lokayukta chairman C.P. Marak aro gipin dilgiparangba dongpaaha.
Meghalaya a·dokni chatro chatrirangna poraia skiani a·bao apalgipa cholrang dongako programme-o mesokangaha.
Dakchakaniko man·a kragipa chatro chatrirangna scholarship-rang, financial assistance scheme-rang aro Payback Policy-rangni gita dakchakna university-ni ku·rachakgipa ong·a, jemangan mongsonggipa susaani porikkarangko see chu·soka aro fee reimbursement aro gipin academmic-oniko namgnirangko man·a cholrang donga aro kam ka·anio chu·sokgipa ong·gen, ine USTM-ni Chancellor Mahbubul Hoque agan-talatangaha. r
Chief Justice Revati Mohite Dere nambata gadango chu·sokgipa chatro chatrirangna nama skaniko on·aha aro uamangni nisanona kimkim ong·an baksa re·mikkangchina uamangko didiangaha aro songsalni daitorangko bilake ra·chinaba mol·molangaha.
