SHILLONG: Meghalaya a·doko gong kror 3214-ni rama jal·langrangko da·al Sombar salni bako, Union Road Transport & Highways Minister Nitin Gadkari, a·bachengate on·anggen.
Iani bidingo talataniko on·angengon, ia project-rangara, gital National Highway (NH) rama dilbri aro gitcham rama dilgniko gital dake taritaiani ong·enga aro ia kamrangko Union Minister, salgnina ong·atenggipa North East India Infrastructure Summit & Exhibition (NEIINFRA) 2026-o a·bachengate on·anggen ine Robibar salo, a·dokni Chief Minister Conrad K Sangma parakataha.
Chief Minister-ni parakatani gitade, ia rama jal·langrangko tarianichi ian a·doko re·a doaniko namdapatan baksana namroro silroroaniko ra·baani gita ong·enga aro ia project-rangara, gong kror 951-ni Tura Bypass, gong kror 737-ni Dhubri-Phulbari Bridge-Selsella rama, gong kror 564-ni Pynursla Bypass aro gong kror 504-ni Selsella-Goeragre rama ong·enga. Ia project-ni ning·o, Shillong-Dawki rama aro Jowai Bypass-koba taridapna gita jako ra·gen ineba Chief Minister parakataha.
North East India Infrastructure Summit & Exhibition (NEIINFRA) 2026-ko June-ni 15 aro 16 tarikrango salgnina Shillong-o ong·atenga aro ia summit-o dingtang dingtang dilgiparang, bading chiwalgiparang, nokrangko rikgiparang, bank-rang aro technology company-rangba bakko ra·angna sienga.
Ia Summit-ko Federation of Industry & Commerce of North Eastern Region (FINER), Meghalaya sorkari aro Build India Foundation baksa nangrime ong·atenga aro ia tom·anio Union Ministry ge 8, salgro salaram a·dokrang aro gipin dolrangba bak ra·enga.
Kr 3214-ni rama jal·langrangko da·al Union Minister a·bachengatgen
Date:
Share post:
