NEHU Tura Campus-o kam ka·giparang kamrangko dontonge jingjengata

TURA: North Eastern Hill University (NEHU), Tura Compus-o kam ka·enggiparang, uamangni dabianirangko chu·sokatchina gita dabie Tura Campus Staff Welfare Association (TCSWA)-ni bimango Mongolbar saloni kam ka·gija ‘Pen Down-Tool Down’ jingjengataniko campus ning·on dakangaha.
Iani bidingo TCSWA-ni ku·wattimgipa T.K. Marakni aganani gitade, uamangni dabienggiparangara Department of Personal Training (DoPT) Order-ko a·bachengatchina, Employee-rangko gadangni kri nigrikani gri mitamko semi skill-ona ra·doahachim indiba dikdiksani gisepon uamangko unskill-ona ra·onpilaha, iandake dakanira dilgiparangni kal·ake roani gita ong·a aro chingni gisiko neng·nikataniko man·a, unigimin ia kamrangko nipiltaichina, unbaksana mitamrang EPF-ko man·aha aro mitamrang man·kuja iani bidingo batanggimin salrangoba chubata authority-rangna u·iatahachim indiba da·alonaba mamingkoba dakkujaenga. Chinga apsan kamrangko sualgrike ka·genchimoba man·anirangko apsan man·pajaenga, salary-rang bang·ja baksana mitamrang EPF-ko man·jaengani a·sel neng·nikaniko man·enga. Unigimin apsan kamna apsan dormaha-ko on·china chinga dabienga ineba parakaha.
NEHU-o kam ka·e sianggiparang, kamoni neng·takgiminrang pension dongjagenchimoba Gratuity mangmangkoba man·paja ine aganengon, iani bidingo uamang an·tangtangna dabigenchimoba authority-rangoni lekkakosan see on·aiaha indiba man·a nangchongmota ine mamingkoba dakdapa dongjani gimin uamangni kamoni neng·takani ja·mano aro siangani ja·mano dongrikenggipa nokdangni manderang neng·nikanirangko man·enga unbaksana sana-bananirango NEHU-ni maming dakchakanirangko man·ja ine T.K Marak aganaha.
Somoi gita dormaharangkoba man·jaenga ine janapengon, “Chinga chingni bang·pagija man·paenggipa dormaharangko mangba somai gita man·jaenga, jeni a·selan saa-ding·anirango aro bi·sarangna school fees gamanirango neng·nikanirangko man·enga. Iani bidingoba chinga chubata gadangona seachi u·iatahachim indiba da·alonaba maming dingtangani dongkuja,” ine Marak aganaha. Unigimin chingni dabianirangko knachakkujana kingking kamrangko dontonge jingjengataniko dakangkugen ineba TCSWA-ni ku·wattimgipa parakaha.
Indake DoPT Order-ko a·bachengatchina, arbitrary promotion aro demotion-ko nipiltaichina, Gratuity-ko ta·raken on·china aro employee-rangna somai gita aro apsan kamna apsan dormahako on·china gita TCSWA dabienga.