BETASING: Manderangna kamrangko dangdike on·anio nambate ka·na, parak ong·ani dongna aro manderangni neng·nikanirangko ba nanganirangko knatime ra·enba, chu·sokate on·na miksonganio BDO Connect program-ko Mongolbar salo, South West Garo Hills a·jani Betasing C&RD Block-o ong·atangaha. Ia program-ko Betasing C&RD Block-ni Block Development Officer (BDO) CRN Sangma, dingtang dingtang department-rang baksa nangrime ong·atangaha.
Ia BDO Connect program-ko ong·atanio, Betasing C&RD Block-ni ning·o donggipa dingtang dingtang songrangoni manderang bak ra·angenba, an·tangtangni nanganirangko, neng·nikanirangko aro namroro silroroanio chu·sokgijanirangko sorkari official-rangna agan-talate on·na cholrangko man·aha.
Ia BDO Connect program-ko ong·atanio dingtang dingtang sorkari department-rangni officer-rang bak ra·e, songo noko namroro silroroani, sorkarini scheme-rang, lekka pora, an·seng baljokani, janggi tangani cholrang aro gipin kamrangni bidingo manderangni sing·anirangna aganchakanirangko aro talatanirangko on·angskaaha.
Je kamrangkon ia tom·anio officer-rang talate ba chu·sokate on·na man·jahachim, uandakgipa kamrangko dongimin somoi gita chu·sokatna ba nanga gita ja·kurangko de·skana department officer-rang ku·rachakangaha.
Ia program-ko ong·atanio, Betasing Block-ni BDO CRN Sangma, jinmana aganprakangengon, je nangani ba neng·nikanirangkon ia program-o manderang agan-janape on·gen, uarangko nangchakegipa official-rangna sokate on·gen aro kamrangko chu·sokate on·na jotton ka·gen ine ku·rachakaniko on·angaha.
