TURA: North Garo Hills-ni District Police-o Traffic Police unit dongkujani a·sel ramarango nirok sandianirangko on·na man·jaengani gimin aro manderangna naljokaniko on·na gita traffic-ni niam retirangko name nirok sandina man·jaengani gimin North Garo Hills a·jana dingtangmancha Traffic Police unit-ko songe on·china gita A·chik Conscious Holistically Integrated Krima (ACHIK) Northern Zone, a·dok sorkario dabiangaha. Iani bidingo ACHIK Northern Zone-ni co-chairman Rorok R Marak aro uni dol, North Garo Hills a·jani Additional Superintendent of Police (ASP) Ravi K Sangma-ko gronge memorandum-koba on·angjolaha.
“Da·o dipet North Garo Hills a·jao chu·gimik bilko jako ra·e kamko ka·enggipa Traffic Police unit dongkuja aro traffic-ni kamrangkoba general duty-ko ka·enggipa police ba sipairangan jako ra·e ka·na nangengani gimin traffic-ni niamrangko name nirokatna ba chu·sokatna man·jaenga. North Garo Hills a·jao Resubelpara, Bajengdoba, Mendipathar, Kharkutta aro uandakgipa mongsonggipa biaprang gita national aro state highway-rang dongani gimin North Garo Hills a·jaoba traffic-ko nambate nirokna Traffic Police unit-ko nangchongmotenga,” ine ACHIK Northern Zone-ni co-chairman, North Garo Hills a·jani ASP-na memorandum-ko on·angani ja·man parakataha.
Marak-ni parakatani gitade, North Garo Hills a·jani ramarang gita ma·manti bosturangko salruragipa garirang, skatang salruraengani a·sel ja·achi re·ruraenggipa manderangna, mongsongbate skulrangchi re·enggipa chatro chatrirang, bazaar-anti cha·giparangna kenchakna nangani ong·enga aro ramarango manderangna naljokaniko on·na gita Traffic Police-ko nangchongmota.
Bazar anti-rango dal·dalgipa garirang, skatang garirangko donrongani a·sel, bazaar anti cha·enggiparangnasan ong·aigija, dingtang dingtang nanga kamrangna re·ruraenggipa manderangnaba neng·nikanirangko ong·atronga ine janapatengon, iandake skatang gari donaniko champengna gita Traffic Police-rangko nangan baksana, gari gorarangko salanio helmet, seat belt-rangko ganna nangani gimin aro garirangko naljoke salna gita manderangna awareness program-rangko ong·atna gitaba Traffic Police-ko nangenga ine ACHIK Northern Zone-ni co-chairman parakataha.
Indake ong·engon, North Garo Hills a·jani National, State aro District highway-rango salantian patrolling-ko dakna, traffic-ni niamrangko bilakbate nirokanichi, niam pe·giparangni kosako rakgipa ja·kurangko de·na, accident ong·ronggipa ramarango PWD baksa nangrime mikrakatanirangko on·na, skul, bazaar-anti aro jinmani biaprango road safety-ni gimin awareness program-rangko ong·atna gita North Garo Hills a·jana Traffic Police Branch ba unit-ko songe on·china ACHIK Northern Zone, a·dok sorkariko didiataha.
