DADENGGRE: Special Intensive Revision (SIR)-ko ong·atna siengani gimin Tikrikilla C&RD Block ning·o donggipa 44-Raksamgre (ST) Assembly Constituency aro 45-Tikrikilla (ST) Assembly Constituency-ni Booth Level Officer (BLO)-rangna, agan-talatanirangko on·na gita Bristibar salo, training program-ko Tikrikilla C&RD Block-ni gitcham Block Office-o donggipa Multi Facility Centre-o ong·atangaha.
Ia tom·aniko ong·atanio, West Garo Hills a·jani Additional Deputy Commissioner (ADC) Pearla D Sangma, jinmana aganprakangengon, SIR-ko ong·atani miksonganirangko agan-talate on·angenba, electoral roll-rango pu·onna man·gipa manderangko watchanggaljana gita aro gipin biaprangoni manderangko electoral roll-rango segatna man·jana gita ia SIR-ko ong·atenga ine parakangaha. Special Intensive Revision-ko dakanio chu·sokanide BLO-rangni on·kange kam ka·aniosa pangchakbatgen ineba Sangma aganaha.
Ia tom·anio, Dadenggre Civil Sub-Division-ni Assistant Commissioner Solomon J Syiem-ba dongpae bak ra·angaha.
Special Intensive Revision-ni bak gita booth level officer (BLO)-rang, June 30 tarikoni July 30 tarikona, nokantichi re·e, electoral roll-rangko nipiltaina sienga aro ia SIR-ko name chu·sokatna man·na gita pilak Assembly constituency-rangon awareness program-rangko ong·atsamsoenga.
