A·doko kr 1,246-ni project-rangna Union Finance Minister pangchakaniko songe on·a

SHILLONG: Externally Aided Project (EAP)-ni ning·o gimik gong crore 1,246-ni project-rangna Sukrobar salo, Union Finance & Corporate Affairs Minister Nirmala Sitharaman, pangchakaniko songe on·angaha aro ia project-rangna pangchakaniko songanio, Meghalaya a·dokni Chief Minister Conrad K Sangma, Cabinet-ni gipin minister-rang, sorkari official-rang aro gipinrangba dongpae bak ra·angaha.
Ia project-rangara, mongsongbate rama jal·langrangko tariani, tourism-ko tang·doatani, lekka porako namdapatani aro a·doko songdongenggipa manderangna janggi tangani cholrangko on·anian ong·enga.
Ia tom·bimonganio Union Finance Minister, jinmana aganprakangengon, India a·songni dal·roroanio salgro salaram a·dokrangni mongsonggipa ong·ani gimin janapangenba, salgro salaram a·dokrangara da·o a·songni dal·roroanio monsonggipa bakan ong·engaha ine aganaha.
Salgro salaram a·dokrangni mongsonggipa bilrangni gimin janapatengon, salgro salaram jolrango man·gipa cholrangchi namroro silroroaniko ra·bana nangengani gimin Union Minister aganangenba, ia nisanko externally aided project-rangchi chu·sokatani gimin talataniko on·angaha.
Meghalaya a·doko a·bachengatgipa project-rangni gimin janapangengon, ia project-arangara, ong·telaigipa namgnirangko kam ka·e cha·ani chol, man·dapani aro man·e cha·anio dal·roroatna tarigipa project-rang ong·a ine Sitharaman aganaha.
Ia tom·anio, Meghalaya a·dokni Chief Minister Conrad K Sangma-ba aganprakangengon, Meghalaya a·dokni namroro silroroanio EAP-rangni dingtangatna man·gipa kamrangni gimin janapangenba, EAP-ni ning·o tangka paisa chamaniko ma·sisretokani gimin talataniko on·angaha.
EAP-rangara, dal·dalgipa kamrangna tangka paisarangko dakchake on·anio nambatsranggipa cholrangoni mingsa ong·a ine janapatengon, salgro salaram a·dokrango iandakgipa project-rangna tangka paisarangko loan on·anio 90 percent-mangni gitade India sorkarisa jako ra·ani gimin ian Meghalaya gita dakgipa a·dokrangnade namen namgni ong·a ine Chief Minister aganaha.
Meghalaya a·doko a·bachengatgipa kamrangni gimin janapangengon, da·o dipet a·doko dingtang dingtang kamrang, jekai gama ge·ani, rama jal·lang aro nokrangko rikani, samtangtango ong·telaigiparangko ripingani aro kam ka·giparangko tarianio gong crore 12,000-na baten EAP-ni kamrangko ka·enga ine Chief Minister parakataha.
Dingtang dingtang kamrango, mongsongbate Meghalaya Logistics & Connectivity Improvement Project-o dongimin arina bate tangka paisarangko on·na ra·chakahani gimin ua dingtangmancha Union Finance Minister-koba mittelpilangaha.
Iandakgipa dakchakanirangara, Meghalaya aro salgro salaram jol gimikko namroro silroroatna kam ka·anio India sorkarini ka·dongani aro on·kanganiko mesokani ong·a ine Sangma aganaha.
Ia tom·bimonganio bak ra·anggipa gipin manderangara, Meghalaya a·dokni Tourism Minister Timothy D Shira, Education Minister Lahkmen Rymbui, Veterinary & Animal Husbandry Minister Sanbor Shullai aro gipinrang ong·a.