AMPATI: Meghalaya a·dokni National Health Mission (NHM) ning·o Stop Diarrhoea Campaign (SDC) 2026-ko Bristibar salo, South West Garo Hills a·jani Balalgre LP skulo a·bachengataha.
Ia SDC 2026-ko, South West Garo Hills a·jani Additional Deputy Commissioner DBG Momin a·bachengate on·angaha aro ia program-ko ong·atanio, a·jani health official-rang, health worker-rang, songni nokni dilgiparang, skigiparang, chatro chatrirang aro jolo songdongenggipa manderangba bak ra·angtokaha.
Ia Stop Diarrhoea Campaign-ara, manderangni bakrimanichi, rongtal an·talako rakkianichi aro somoi gita sanna bananirangko ra·anichi manderangni gisepo, mongsongbate bi·sarango diarrhoea ba okgitchak saaniko champengna gita awareness program-rangko ong·atanian ong·enga.
Ia SDC-ko a·bachengatanio, South West Garo Hills a·jani ADC DBG Momin, jinmana aganprakengon, ia campaign-ko ong·atenganina Health Department-ko mittelpilangenba, diarrhoea sabisiko chel·chakanio, rongtal an·talaniko rakkichina songni nokni manderangko didiangaha. Bi·sarangna aro bilgrigipa manderangna an·seng baljokaniko on·anio, mikrakatanirangko on·ani aro chel·chaksamsoanirangko dakna nangani giminba Momin aganangaha.
Ia program-ko ong·atanio, South West Garo Hills a·jani District Maternal & Child Health Officer (DM&CHO) Dr Noreen Sangma-ba aganprakengon, diarrhea ba okgitchak saaniko chel·chakna gita rongtal an·talaniko rakkina aro ritgimin rongtalgipa chirangko ringna nangani gimin agan-talatanirangko on·angaha. Jakrangko sabonrangchi jaksujringna nangani, paikanarangko rongtal an·tale jakkalna nangani, cha·ani ringanirangko rongtale rakkina nangani aro okgitchak saaniko man·on, somoi gita Oral Rehydration Solution (ORS) aro Zinc tablet-rangko ringna nangani giminba Dr Sangma aganangaha.
Ia SDC-ko a·bachengatna skang, songni manderangna indin be·enni gita porikka ra·e niani program-koba ong·atangaha aro ia program-o sak 100 ja·delgimin manderang, sak 28 butchuma budeparang aro sak 19 bi·sarangko man·gipa gimin sak 147 songni manderang, namgnirangko man·aha.
