Shillong-o Film City aro Film Institute-ko kuligen: CM
SHILLONG: World Music Day-ko maniani bak gita Sonibar attamo, skanggipa changna Hello Meghalaya Music Awards-ko Shillong songjinmani Polo-o donggipa SRTG Ground-o ong·ataha.
Ia Music Awards-ko bakgni dake, chong·motan skanggipa bako, Best Folk Song, Best Pop Song, Best hip-Hop/Rap, Best Gospel Song, Best Collaboration, Best Music Video, Best Original Soundtrack, Best Inspirational Song, Icon of the Year aro gnigipa bako, Best Rock Artist, Best Independent Artist of the Year, Best MGMP, Best Female Artist, Best Male Artist, Emerging Artist of the Year aro Song of the Year-na on·angaha.
Ia Hello Meghalaya Music Awards-ko ong·atanio, a·dokni Chief Minister Conrad K Sangma, mongsonggipa sokgipa ong·e, jinmana aganprakangengon, ua an·tangba uni dambemiting somoio saksa git ring·na aro dokna dam·na gisiko nanggipa ong·e, chadamberangni neng·nikanirangko ma·sigipa ong·a aro iani giminsa da·alo ua, dal·drobaenggipa chadamberangna, mongsongbate doka dam·ani aro git ring·anio gisik nanggipa chadamberangna dakchakanirangko on·enga ine parakataha. A·doko doka dam·ani aro jawilwat tarianirang namen tang·doaha ine janapatengon, doka dam·ani, jawilwat tariani, kal·susaani aro dingtang dingtang kamrango gisik nanggipa chadamberangna, an·tangtangni jumangrangko chu·sokatna gita sorkari, dingtang dingtang program-rangko a·bachengate on·aha ine Chief Minister parakataha.
Sorkarini a·bachengate on·gipa Hello Meghalaya-ni chu·sokanio bakrimaniko on·ahani gimin bak ra·gipa sakantiko mittelpilangengon, ia platform-o ata million-ni gita download-rangko man·aha aro ia platform-o dokgipa dam·gipa, git ring·gipa aro dingtang dingtang kamrangko chu·sokatna gita chadamberangna cholko on·enga ine Chief Minister aganaha.
Shillong-o Film City aro Film Institute-ko kulina miksongenga ineba ia tom·anio Chief Minister parakataha.
An·tangtangni git aro doka dam·anirangko tarina nangani gimin janapangengon, dokgipa dam·giparang pilakan music-ko sena aro poraina gita skie ra·na nanga ine Chief Minister, ku·pattianiko on·angaha.
Ia Hello Meghalaya Music Awards-ko ong·atanio, Amachi Sangma, Tarari Kids Choir, Steve Jyrwa, Reble, Khmih Creative Society, Bending Waves Band aro gipinrangba gitrangko ring·e, program-ko an·saobatataha.
