Sima jolo donggipa ramarangko taridapani bidingo CM, Union Minister baksa agangrika
SHILLONG: Union Defence Minister Rajnath Singh, re·anggipa Sonibar salonin salgnina, a·dokni skotong Shillong songjinmao donggipa Eastern Air Command-ona re·baaha aro ia salgnina re·baanio ua, Eastern Air Command-ko niangan baksana, a·dokni Chief Minister Conrad K Sangma-koba Robibar salo gronge, a·dokni nanganirangko knatime ra·angaha.
Robibar pringo, Union Defence Minister Rajnath Singh, a·dokni Chief Minister Conrad K Sangma baksa Eastern Air Command-o International Yoga Day-ko manianio bak ra·enba, yoga kal·anioba bak ra·angaha. Ia Yoga Day manianiko a·songni Prime Minister Narendra Modi, internet gita New Delhi-oni manidilangaha aro ia manianio Defence Minister aro a·dokni Chief Minister-ba video conference gita bak ra·angaha.
International Yoga Day-ko manianio bak ra·ani ja·man Union Defence Minister aro a·dokni Chief Minister, a·dokni dingtang dingtang nangchongmotgipa kamrangni giminba agangrikangaha.
Armed Forces ba sipai dolrangni dakchakanirangko nangenggipa dingtang dingtang project-rang, jekai Shillong Airport-ko dal·batatani, Shillong-oni Barik Point-ona ramako apalbatate tariani aro mongsongbate, India aro Bangladesh a·songni simao, Ranikor-oni Ratacherra-ona tarina miksongenggipa ramani bidingo a·dokni Chief Minister Conrad Sangma, Union Minister-na agan-talate on·angaha.
Ranikor-oni Dalu-ona rama tariani kamrangko bak dake a·bachengmanaha ine janapatengon, Phulbari-Dhubri dolong ramaoni Silchar-chipaknaba ramako tarina a·bachengataha indiba Ratacherra-oni Ranikor-ona dakanggipa ramakosa tarina man·kuja ine Chief Minister talate on·angaha.
Ia ramako tarina bi·aniko ta·raken niatna gita Defence Minister ku·rachakangaha ineba Chief Minister aganaha.
Iana skang, Sonibar salo Union Defence Minister, Eastern Air Command-ni sipairangkoba gronge agangrikangaha aro a·songko warachakanio dakna nanggni kamrangni gimin gisik ra·atpiltaianiko on·angaha.
Pakistan a·songni kosako ka·gipa ‘Operation Sindoor’-ni gimin janapangengon, ian Prime Minister Narendra Modi-ni dilanichi, a·songtangni kamrango pangchakanichisa chu·sokgipa ong·aha ine Defence Minister aganaha.
Eastern Air Command-ko ua India a·songni salaram jolo, mongsonggipa chel·chakani krong ine toe aganangaha.
Dingtang dingtang neng·nikanirangko chagrongna nanggenchimoba an·tangtangni kamrangko nambee chu·sokatengani gimin ua dingtangmancha Eastern Air Command-ni sipairangkoba mittelpilangaha.
Eastern Air Command-ni mongsonggipa kamrangni gimin janapangengon, salgro salaram jolrangara, a·songni simarango bak ong·pagiparangsan ong·aija indiba a·songko chel·chakanio mongsonggipa krongan ong·a ine Union Defence Minister aganaha.
