SHILLONG: Shillong Lok Sabha by-election-na tarikrangko tik ka·ani bidingo Election Commission of India (ECI) parakkujaskal, candidate-ko seokkujawa ine a·dokni Bharatiya Janata Party (BJP) gisik ra·attaianiko on·angaha.
West Shillong-ni gitcham MLA Mohendro Rapsang-ko party-ona rimchaksoani ja·man kobor ra·timgipa manderang baksa agangrikengon, Shillong Lok Sabha by-election-ni tarikko ECI-oni parakkujaskal, party-ni candidate-ko seokani bidingo party-ni dilgiparang chanchikujawa aro candidate-ko seokanide ma·mongo party-ko dilgiparangni jakosa ong·a ine Mongolbar salo, BJP-ni state president Rikman G Momin parakataha.
Shillong Lok Sabha by-election-na sako party-ni candidate dake mingna miksongenga ine sing·anina aganchakaniko on·angengon, da·o dipet party-ni gisepo, candidate-ko seokani bidingo chanchia dongkuja inesa Momin aganchakaiaha.
“Ia sing·aniko batanggimin jagittam jabrimangonin na·simang ango sing·engaha,” ine Momin aganaha.
West Shillong-ni gitcham MLA-ko Shillong Lok Sabha by-election-na candidate dake seokani cholrang dongama ine sing·on, ia pilakan ma·mongo dilgiparangni nangnikaniosa pangchakaigen ine BJP-ni state president parakataha.
“Candidate-ko seokanide angni daito ong·ja indiba ma·mongo party-ko dilenggiparangni daitosa,” ine ua aganaha.
Shillong Lok Sabha by-election-na a·dokni BJP tarisomanaha indiba ECI-ni parakanina sengkuenga ineba Momin aganaha.
“Chingni dilgiparang, Election Commission-ni parakaniko sengengkua maina da·o dipet Shillong Lok Sabha by-election-ni bidingo ECI parakkujaenga. Chinga iana sikkena nangjawa aro kamtangko ka·e dongsoaigen,” ine Momin aganaha.Re·anggipa February-ni 19 tariko, Shillong-ni Lok Sabha MP Ricky Andrew J Syngkon-ni tanggitik saaniko man·e siangani ja·man da·o Shillong Parliamentary Constituency-ni by-election-ko ong·atna nangengachim ine nikna man·a.
