AMPATI: India sorkarini ning·o donggipa Tourism Ministry-ni Swadesh Darshan Scheme-ni ning·o, South West Garo Hills a·jani mingsinggipa Katta Beel-o kuligipa Tourist Facilitation Centre-ko chalaina gita Budbar salo, Katta Beel Fishery Cooperative Society (KBFCS)-na pakwate on·angaha.
Ia Tourist Facilitation Centre-ko pakwate on·na dingtangmancha tom·aniko Katta Beel-o ong·atangaha aro ia tom·anio, Mahendraganj constituency-ni MLA Sanjay A Sangma, mongsonggipa sokgipa ong·e bak ra·angenba, ia centre-ko KBFCS-na pakwate on·angaha.
Ia tom·aniko ong·atanio, South West Garo Hills a·jani Deputy Commissioner aro District Tourism Promotion Society-ni Chairperson Anendya Raajsshre, Zikzak C&RD Block-ni Block Development Officer Torali K Marak, South West Garo Hills a·jani Tourist Officer Collin Jeffrey Ch Marak, KBFCS-ni member-rang, aro jolo songdongenggipa manderangba bak ra·angtokaha.
Ia program-ni bak gita, Tourist Facilitation Centre-ni chabi aro certificate, Katta Beel Fishery Cooperative Society-na pakwate on·angjolaha.
Ia program-ko ong·atanio, Mahendraganj constituency-ni MLA Sanjay A Sangma, jinmana aganprakengon, jolni namroro silroroanina jolo donggipa tourism-ni gam-jinrangko name rakkina nangani gimin janapangenba, ia Tourism Facilitation Centre-ko name chalaichina aro name nirokchina KBFCS-ni member-rangko didiangaha.
Tom·ani a·bachengao, KBFCS-ni chairman, rimchaksoani kattarangko aganangskaaha.
Ia tom·anio, South West Garo Hills a·jani Deputy Commissioner-ba jinmana aganprakengon, ia project-ni gamchataniko aro sorkarini scheme ning·o on·gipa dingtang dingtang tourism-ni gam-jinrangko name rakkianio jolo songdongenggipa manderangni daitorangko agan-talate bon·angaha.
