TURA: Game ge·e cha·giparangna, an·tangtangni game ge·e man·gipa bosturangko chel·chakani, jo·ong aro sabisirangko name nirokani aro gama ge·anirango gital kolrangko jakkalani bidingo u·iatna aro talate on·na gita June 1 tarikoni 30 tarikona Agriculture & Farmers Welfare Ministry-ni ong·atenggipa ‘Khet Bachao Abhiyan’ campaign-ni bak gita Budbar salo, West Garo Hills a·jani ICAR-Krishi Vigyan Kendra (KVK), training program-ko, South West Garo Hills a·jani Betasing Block ning·o donggipa Garodoba songo ong·atangaha.
Ia training program-ko ICAR-KVK-ni SMS (Vegetable Science) Ramawatar Yadav aro SMS (Agronomy) Dr Priyanka Saha dakdilaha aro ia program-o songni Nokma Paritosh Ch Hajong-ba dongpae bak ra·angaha.
Ia training program-ko ong·atanio Garodoba jolrango donggipa dingtang dingtang songrangoni game ge·e cha·giparang bak ra·angtokaha aro ia program-o game ge·e cha·giparangna dingtang dingtang mi misi aro me·surangni bitchilrangkoba KVK-ni official-rang suale on·angjolaha.
