SHILLONG: Garo Hills-o SAI Computers Limited-na on·gimin contract-ko nipilna gita Meghalaya sorkari, committee-ko songe on·angaha.
Ia power distribution company (discom) ba bijoli suale on·gipa company-ko Mawsynram-oniko ra·galani ja·man Garo Hills-o bijoli on·na namja aro bill-rangko bate taria ine dingtang dingtang dolrang aro bijoli jakkalenggipa manderangba matnangtokahachim. Bijoliko name on·na man·ja aro bill-rangko nangana bate tarienga ine matnangenba, ia company-na on·gipa contract-ko den·galpilchina dingtang dingtang dolrang aro bijoli jakkalenggipa manderang dabitokengachim.
Iani bidingo kobor ra·timgipa manderang baksa agangrikengon, manderangni badi ka·anirangko man·ahani gimin uamang, Western Zone-ni Chief Engineer-ni dilanichi dingtangmancha committee-ko songaha aro ia committee-ni report-na sengkuenga ine MeECL-ni Chairman aro Managing Director (CMD) Sanjay Goyal parakataha.
“Bijoliko name on·ja ine mitam badi ka·giparangkode namatna gita man·aha indiba bill tarianikosa Committee, name nipilkuenga,” ine Goyal aganaha.
A·dokni Dalu, Phulbari, Nongalbibra aro Mawsynram jolrango, bijoliko on·na gita SAI Computers Limited-ko Input-Based Distribution Franchisee (IBDF)-na seokahachim aro ia company-ni kamara, meter-rangko chatani aro nirokani, meter-rangko nie bill-rangko tariani, kajinarangko gilani, bijoli jakkalenggipa manderangni neng·nikanirangko nirokani, transformer-rangko tariani aro kajina man·anio noksan ong·aniko komiatanian ong·achim.
West Garo Hills a·jani Phulbari jolrango bijoliko on·na gita ia company, kamko jako ra·a intalan, bijoliko name on·jani gimin, skatang dairangko ra·ani gimin aro bill-rangko bate tariani gimin dingtang dingtang dolrang aro bijoli jakkalenggipa manderang, ia company-ni kosako matnangna gita a·bachengaha.
Indake ong·engon, a·dokni pilak biaprangon, bijoli cha·ue salaniko champengna gita MeECL, nirok sandianirangko dakjringenga ineba Goyal parakataha.
Bijoli cha·ue jakkalgiparangni kosako rakgipa ja·kurangko de·na Electricity Act-ni ning·o sorkarina bilko on·manaha ine janapatengon, bijoli cha·ue jakkalenggipa manderangni a·sel, niam gita bijoli jakkalenggipa manderangsa neng·nikanirangko chagrongna nangrongenga ine MeECL-ni CMD parakataha.
