AMPATI: District Nutrition Leadership Program (DNLP)-ni bak gita June-ni 25 aro 26 tarikrango, Ampati-ni Meghalaya State Rural Livelihoods Society (MSRLS), District Animal Husbandry & Veterinary Department baksa nangrime, salgnina Poultry Farming-ni bidingo Vocational Training program-ko Ampati-ni Vocational Training Centre-o ong·atangaha aro ia program-o seoka man·gipa Self Help Group (SHG) aro Village Organisation (VO)-rangoni gimik sak 60-mangni gita bak ra·angtokaha.
Ia salgnina ong·atanggipa Vocational Training program-o Animal Husbandry & Veterinary Department-ni official-rang, do·orangko jilanio, dakna nanggnirangko, mongsongbate tika su·ani, sabisirangko chel·chakani, rongtal an·talaniko rakkiani, jabol galani aro uandakgipa kamrangni gimin skie on·angaha.
Ia salgnina ong·atanggipa training program-o, do·o jilanio nangchakegipa kamrangni bidingo sing·anirangnaba official-rang, agan-talate on·angtokaha.
Nokdangrango do·o bitchirangko nambate chi·atanichi, nokdangrangni man·dapaniko bariatan baksana bi·sarangna namgipa cha·anirangko on·na miksonganio ia training program-ko DNLP-ni ning·o ong·ataha.
