TURA: Garo Hills-o bilsianti ong·atenggipa 100 Drums Wangala Festival ba Dama bol 100-ko doke Wangala maniani ia bilsio, Golden Jubilee ba bilsi 50 gapaniko manina siengani gimin Sombar salo, Hundred Drums Wangala Festival Committee (HDWFC)-ni chairman Ronald Rikman Sangma-ni dilanichi, committee-ni membor-rang, Meghalaya a·dokni Tourism Minister Timothy D Shira-ko Shillong songjinmani Civil Secretariat-o grongenba, ia manianiko ong·atani bidingo chanchirimangaha.
Koborko on·ani gitade, ia 100 Drums Wangala manianiko ia bilsi, November jani 12 tarikoni 14 tarikona Wangala A·dam Chibragre-o ong·atna sienga aro ia bilsio 100 Drums Wangala maniani bilsi 50 gapaniko manina siengani gimin ia chang ia manianiko dal·bate ong·atna miksongenga.
HDWFC-ni membor-rangko gronganio a·dokni Tourism Minister, committee-ni nanganirangko knatime ra·angaha aro ia manianiko chu·sokgipa ong·atna pilak nanga dakchakanirangko on·na ku·rachakangaha.
Ia chang 100 Drums Wangala maniani Golden Jubilee ba bilsi 50 gapaniko manina siengani gimin ia maniani bak gita 1000 Drums ba dama bol 1000-ko doke Wangala manianiko ong·atna miksongenga ine adita salrangna skangsan a·dokni Tourism Minister parakataha.
Ia bilsini 100 Drums Wangala manianiona gipin biaprangoni bang·bata manderangko salbana gita sorkari, Garo Hills-o tourism-ko tang·dobatatna miksongenga ineba Tourism Minister parakataha.
Wangala manianiara, A·chikrangni dal·batsranggipa aro mongsongbatgipa maniani ong·a aro ia 100 Drums Wangala manianiko A·chikrang, 1976 bilsionin manina a·bachenge, bilsiantian mi-misirangko ramanani ja·man manirongenga. Ia bilsio, 100 Drums Wangala manianiko a·bachengaoni bilsi 50 gapengahani gimin ia manianiko dal·bate manina tarisamsoengon, ia manianiona dingtang dingtang a·songrangoni tourist-rangkoba sokbana ka·dongsoenga.
