Ma·mongni scheme-rangko chu·sokate on·anide a·dok sorkarini daitosa: BJP

SHILLONG: Meghalaya a·dokna namroro silroroani scheme-rang baksa a·songni Prime Minister Narendra Modi, dingtang dingtang union minister-rangko a·dokona watatenga aro da·o ia scheme-rangko chu·sokate on·anide a·dok sorkarini daito ong·enga ine Sombar salo, Bharatiya Janata Party (BJP)-ni MLA AL Hek parakataha.
“Namroro silroroani kamrang baksa union minister-rangko bang·en Meghalaya a·dokona watatengani gimin anga Prime Minister-ko mittelna ska aro da·o NDA sorkarini on·atenggipa scheme-rangko chu·sokate on·anide a·dok sorkarini daitoan ong·a,” ine Hek, kobor ra·timgiparangna aganaha.
Ma·mongni scheme-rangko NPP-ni kangdraenga ine matnanganirangko knana man·enggipani bidingo sing·anina aganchakaniko on·angengon, ia scheme-rangko banoni watatenga, darangan ma·sia ine BJP MLA aganaha.
“Je political party-ba ia kamrangko a·kangna man·aia indiba ia scheme-rangara BJP-ni Prime Minister-onisa sokbaenga ine darangan ma·sia. Uan NDA-ni prime minister ong·e oe beben indiba uan BJP-ni ong·a. Uni gimin je kamrangkon chu·sokate on·ahachim, ia pilakan ma·mongo BJP-ni chu·sokate on·gipa kamrangsa ong·a,” ine ua aganaha.
Ma·mong sorkarini on·atenggipa scheme-rangko chu·sokatanide department-tangtangni daitosa ong·a ineba Hek parakataha.
“Badiaba scheme PWD-oni re·baenga ong·ode, ia kamko chu·sokatanio PWD-sa an·tangtangni bewalo kamko chu·sokatgen aro health department-ni ong·ode health department-sa an·tangtangni bewalo chu·sokatgen,” ine ua aganaha.
Ma·mong sorkarini on·atenggipa dingtang dingtang scheme-rangko name chu·sokatna nanga ine janapatengon, “Ia scheme-rangko aro namgnirangko manderangona sokate on·anide a·dok sorkarini daitosa ong·a,” ine Hek parakataha.
Ma·mong sorkarini scheme-rangko election-ni somoirangosa watatenga ine matnanganiko jegalatengon, “Ian election-o maming nangchakeani dongja indiba ian manderangni namroro silroroaninasa ong·a. Namroro silroroanide je somoioba ong·aigen aro chinga Meghalaya a·dokna namroro silroroaniko, mongsongbate tourism, sports aro health sector-rango nangnikbatenga,” ine BJP MLA aganaha.
Meghalaya a·dokna BJP, ma·mong sorkarini dakchakanirangko bi·atjringenga ineba ua aganaha.