TURA: West aro South West Garo Hills (Territorial) Division-ni Divisional Forest Officer (DFO) ning·o donggipa Hollaidanga Range-ni Range Forest Office, West Garo Hills a·jani Chibinang-Bolarbita aro Selsella jolrango niam gri chalaienggipa saw-mill ba bol ratani karkanarangko chadrapenba, chipe donattokaha.
Chipatgipa saw mill-rangoni damgittamde Chibinang-Bolarbita jolrango aro damsade Selsella jolo ong·a.
Iani bidingo u·iataniko on·atengon, West Garo Hills a·jani a·kawe jolrango niam gri chalaienggipa saw mill-rangni bidingo koborrangko man·soani ja·man Forest department-ni dolrang, ia saw mill-rangko chadrapeaha aro sawmill-rangko chipe donattokaha ine West aro South West Garo Hills (Territorial) Division-ni Divisional Forest Officer (DFO) Rupankar K Marak parakataha.
Ia sawmill-rangko chadrapeanio, niam gri bol ratna jakkalenggipa dingtang dingtang ostrorangkoba Forest dolrang rim·aha ine Marak u·iataha.
Ia jolrango niam gri sawmill-rangko chalaienga ine koborko man·soani ja·man Forest department-ni dolrang, ia biaprangko chadrapeon, ia jolrango gital kuligipa sawmill-rangko, bol ratani ostrorangko aro dingtang dingtang bosturangko man·aha aro ia sawmill-rangko ua biapon nisie galjolaha ineba DFO parakataha.
Ia biaprangoniko Forest dolrang, ratdaldale ra·bagipa bolrangkoba rim·aha ine DFO u·iataha.
