Rama taria namjani gimin PWD official-rangni kosako ASPF badi ka·a

TURA: West Garo Hills a·jao Rajabala-Balachanda-Haldibari-Selsella ramako name tarija ine matnangenba, PWD official-rang aro kamko ka·gipa contractor-ni kosako ja·kuko de·china Tura-ni A·chik State People’s Front (ASPF), West Garo Hills a·jani Superintendent of Police (SP)-na badi ka·doangaha.
PWD official-rang, rama tarigipa company baksa melie, manderangni tangka paisarangko jakkalsretaha ine matnangenba ASPF, BNSS-ni Section 173 (3)-ni ning·o West Garo Hills a·jani SP-na badi ka·doangaha.
“Rajabala-Balachanda-Haldibari-Selsella ramako adita salrangna skangsan blacktopping on·e tariahachim indiba ramako tarigipa company, department-ni official-rang baksa melie, ia ramako tarianio bostu namgijako jakkalaha. Ia ramako bitumen-chi name aro chate reppigija contractor-rang, ramani kosako ba·esan bitumen-ko on·aiaha aro iani a·selan ia rama da·o ta·raken nosto ong·piltaiaha aro ia ramao black topping on·gipakoba altuen kikgalna man·aia,” ine ASPF parakataha.
Ia ramako name tarijani a·selsa ta·raken nosto ong·pilengaha ine janapatengon, ian ia company aro department official-rangni tangka jakkalsretaniko mesokani ong·a ine ASPF matnangataha.
Ia rama da·o ta·raken nosto ong·pilahani a·sel gari gorarangko nosto ka·an baksana sagipa manderangko salruraanio aro dingtang dingtang nangchongmota kamrangna re·ruraenggipa manderangna kenchakna nangani ong·enga ineba ASPF, SP-na badi ka·e sedoatgipa chittio parakataha.