Bishop George Mamalassery Road-ko Minister Marcuise Marak-chi oprakata

Tura: In a fitting tribute to the late Bishop George Mamalassery-ko mande ra·e maniangani somoio Walbakgre Junction-oni Holy Cross Hospital-ona dakanggipa ramako Bishop George Mamalassery Road dake mejal Soil and Water Conservation, Public Health Engineering (PHE) aro Housing-ni Minister, Marcuise N. Marak jinmana parakataha.
Tura-ni St. Luke Church, Walbakgre-o Tura Diocese-ni gitcham Bishop-ni siani gnigipa bilsi gapaniko mande ra·e maniani somoio parakataha.
Programme-o Bishop Andrew R. Marak, Tura Diocese-ni Bishop; Auxiliary Bishop Jose Chirackal; sorkari official-rang, pamongrang, toromko dilgiparang aro bebe ra·rimskarang bang·en bang·en bak ra·angaha.
Gisik ra·e maniani bak ong·e, Bishop Andrew R. Marak, Bishop George Mamalassery sagini tongsa mangkrong aro see dongipa rongplengko oprakaha, Garo Hills a·jao  gisikni gitasan ong·ja, lekka pora, songsal aro an·seng-baljokaniko on·ani a·barango  uni janggi tanga gimikko on·kange dangdike on·angna tariaha.
Walbakgre Junction-oni Holy Cross Hospital-ona dakanggipa ramako Bishop George Mamalassery Road dake Minister Marcuise Marak official-ni gita parakataha, ia ramako Bishop sagini an·tangna chanchigija ru·uta chasongrangna dangdike on·anganina aro a·dokni manderangna on·gilanganina mingangaha.
Bishop sagi bilsi 28-na Tura-ni Diocese-na namgipa kamrangko dakmesokangaha, ua manderangni gisikni gita janggi tangna dila mangmangsan ong·ja indiba education, sanna bannani aro songsalni namgnina kam ka·ani a·barangoba kam ka·angaha, ine ua aganaha.
Uni dilanichi dingtang dingtang namroroanina ja·ku de·ani aro institution-rangni gita Garo Hills gimiko manderangni dilaniko dingtangatna Bishop Mamalassery-ni nikjumangsogipa ong·a ine Minister aganaha.
“Bishop George Mamalassery, 1970 bilsio Dalu-ni Parish Priest-na songangna skang  Tura, Dalu aro Baghmara-o Assistant Parish Priest dake uni priest ministry-o kam ka·na a·bachengaha aro bilsi 10-na dangdike on·angaha.
Uni dilani ning·o Holy Cross, Rino Simonetti School of Nursing, be·en bimangni aro gisikni gita bilgrigiparangna Monfort Centre for Education-ko kuliaha aro Diocesan Social Service Centre (BAKDIL) aro unagre bang·a gipin kamrangkoba ka·angaha.
1979 bilsini February ja 8 tariko Father George Mamalassery-ko Tura-ni Diocese-na skanggipa Bishop dake Holy See songaha aro uko 1979 bilsini March 18 tariko Tura, Don Bosco School Playground-o Bishop songaha.