FCRA: Salgro salaramo licence donggipa dolbongaoni dolsasan kam ka·enga ine MHA paraka

SHILLONG: Taridapna miksongenggipa Foreign Contribution (Regulation) Act (FCRA)-ni bidingo dingtang dingtang dolrang, mongsongbate salgro salaramni Kristian mondolirang, nipiltaichina gita ma·mong sorkariko diditokengon, gipin a·songrangoniko tangka paisani gita dakchakanirangko ra·na register ka·gipa dolbongaoni dolsamangmangni licence-san da·o kam ka·kuenga ine Ministry of Home Affairs (MHA)-ni data ba see rakkianio parakaha.
Re·anggipa Robibar salosan, a·dokni Chief Minister Conrad K Sangma-ni dilanichi, salgro salaramni dingtang dingtang Kristian mondolirang, Union Home Minister Amit Shah-ko grongenba, FCRA-ko taridapgenchimode, Kristian mondolirangni chalaienggipa skulrang, hospital-rang aro songsalna kam ka·enggipa dolrangna nangchakeaniko ra·bagen ine niamrangko nipilchina gita didiangahachim.
Indake ong·engon, MHA-ni see rakkiani gitade, 2010 bilsi intal salgro salaramni damsni a·dokrango FCRA-ni registration-ko man·gipa gimik dol 2,313-oni dol 463-san kam ka·enggipa (active) licence-rang dongkuenga.
Register ka·gipa dol 1850-oni dol 1224-ni registration-kode den·galpilaha aro dol 626-ni registration-kode ‘bon·chipaha’ ine chanahani gimin ia dolrang, gital dake registration ka·piltaianiko nangengachim ine u·iataha.
Salgro salaram jolo FCRA registration donggiparangoni Manipur a·doko dol 989 ong·e bang·batgipa ong·enga indiba ia dol 989-oni dol 113-san kam ka·engkua aro dol 633-ni registration-kode den·galpile, dol 242-kode ‘bon·chipaha’ ine chanaha.
Uni ja·man Assam a·doko FCRA registration donggipa dol 599 donga indiba ianoni dol 169-ni licence-rangsan kam ka·engkua aro bangkikode den·galpilaha ba bon·chipaha ine chanaha.
Meghalaya a·dokoba FCRA registration donggipa dolrang dol 207 donga aro ianoni dol 81-mangmangsan kam ka·kuenggipa licence-rang donga aro bangkikode den·galpilaha aro bon·chipaha ine chanaha.
Iani bidingo sing·anina aganchakaniko on·angengon, “Anga an·tangde iani bidingo maming kobor dongkuja indiba anga koborko man·sogenchimode ma·mong sorkari baksa agangrikgen,” ine Mongolbar salo, Bharatiya Janata Party (BJP)-ni dilgipa AL Hek parakataha.
Ia bilsio Foreign Contribution (Regulation) Amendment Bill, 2026-ko Parliament-o parakate, FCRA Amendment Rules 2026-ko June jao u·iatani ja·man India a·songo dingtang dingtang skulrangko, hospital-rangko aro songsalna dangdike on·gipa dolrangko chalaienggipa Kristian mondolirangni gisepo jajrengchakani ong·katahachim. Skangode, gipin a·songrangni dakchake on·atenggipa tangka paisarangko man·soani aro jakkalaninasa niamrangko tariachim indiba da·o FCRA-ko taridapaniode, gam-jinrangko chalaiani, institute-rangko nirok sandiani aro uandakgipa kamrangnaba dingtangmancha niamrangko tariahani gimin Kristian mondolirangni gisepo jajrengchakani ong·kataha.
Kristian mondolirangni jegalenggipa mingsa niamde, Designated Authority-ko bikotanian ong·a maina ia niamni ning·o, je organization ba dolni FCRA registration-kon den·galaha, on·pilaha ba gital dake taripilgija donchipaha, uandakgipa dolna gipin a·songoni on·gilanirang baksana ia tangka paisarangchi tarigipa gam-jinrangko sorkarini songe on·gipa Designated Authority-ni nirokanio donskana nanggnok. FCRA registration-ko somoi gita taripiljagenchimode, ia gam-jinrangko sorkarini songe on·gipa Designated Authority-ni ning·o donkamgnok aro unode ia gam-jinrangko sorkarini agency-rangona ra·jitna ba jinmani namgnina jakkalna gita pale galskana man·gnok.
Ia niamara, gipin a·songrangoni on·gilatgipa tangka paisarangchi, an·tangtang tangka paisarangko gilanichi aro manderangni dakchakanichi ru·uta bilsirangna rikgimin skul, college, hospital, hostel aro welfare centre-rangko chalaienggipa mondolirangna gimaani ong·enga.