TURA: East Garo Hills Dobu-ni nangrimgimin NGO dolrang- AHAM, ADIL aro GSU aro gipinrang RMSA-ni ning·o ong·gipa Dobu Moonlight Secondary School-o Class XI aro XII-ko kuliate Higher Secondary level-ona ra·dochina dabie Deputy Commissioner-ni gita Education Ministery Lahkmen Rymbui-na memorandum-ko on·aha.
Dobu jolni poraigipa bi·sarang jemangan Class X-ko matchotahaode uamang higher secondary education-ko poraikuna gita Rongjeng-ona aro Williamnagar-ona songrena gita nanga. Dobu-oni Rongjeng-ona km 14 aro Williamnagar-ona km 32 chel·a, ua ramako songree poraina nanga. Salantio indita chel·bea ramako songree poraianiara ramram katta ong·ja, be·en-bimang neng·skima baksana, tangka paisa korosrangni bidingo bilongeng neng·nikani soka ine organisation janapaha.
Organisations-ni on·gipa memorandum-o poraienggipa bi·sarangni salantio chagronggipa neng·nikarangko tale janapaha. Cholgri nokdangrangoni bi·sarangde jemangan Classs X pass ka·e higher secondary -ko poraina sikomangba chel·e songree poraina gita cholrangko dongpajae aro songoni nokoni ong·kate gipin biapo nok para donge poraina gita cholrangko man·paja uni gimin jolni school-ko hihger secondary education-ona ra·dochina gita mol·molaha, jedakode jolni chadamberangna bilonge namgni ong·gen aro school dropout ba skia poraianiko dontonggiparangba komigen ine aganaha.
Iarangna agreba NGO-rang school-o nangchongmotgipa infrastructure-rang jekai- desk, chokki, table-rang chu·ongjani giminba janape Education department-ko school-na chu·onga gita infrastructure-ko on·china mol·molaha.
