Ampati: South West Garo Hills-ni Kambakpara songo Sukrobar salo gital Government Lower Primary School nok building-ko songni manderangna nokdonggae on·aha, ian songni chatro chatrirangna nambata gadango lekka porani cholrangko ra·angna gitalgipa chapter-ko a·bachengatani chin dake ong·engaha.
Kambakpara Government LP School-na gital nok building rikgipako Meghalaya sorkarini Excise-na Advisor ong·gipa aro 54-(ST) Mahendraganj Constituency-ni MLA Sanjay A Sangma-chi nokdonggaaha, nokdanggaani somoio sorkari offical-rang, songni dilgiparang, skigiparang, chatro chatrirang aro songni manderangba dongpaaha.
Songni manderang jemangan changsao ia skulo poraianggiparangba ia nokdonggaanio dongpaa, uan da·o chasongsnini gita jatna dangdike on·engaha.
Tom·bagiparangko rim·chaksoaha, institutional-ni chu·sokgipa itihas-ko songni dilgipa Rev. I. A. Sangma aganangaha. Kambakpara Government LP School-lp 1957 bilsio a·bachengataha aro ua bilsionin songoni aro wilwilao donggipa songrangoni bi·sarangna mongsonggipa lekka porani gamchatgipa ong·angaha, ine ua gisik ra·atpile aganangaha. Gitalgipa nok building-ko man·anian skangoni community-ni chu·sokatna sikgipa ong·achim aro ian mikkangchina nambata gadango poraiangna on·anggipa ong·gen, ine ua MLA-ko mitteljole aganangaha.
Meghalaya a·dok gimiko lekka porani a·bao rika cho·aniko bilakdapatna a·dok sorkarini on·kanggipa ong·a ine Sanjay A. Sangma mande jinmana aganangaha. Lekka porani gadangko namdapatna ia bilsio a·dok gimiko ge-2,000 gital skulrang aro college nok buildingrangko rikna sorkari ja·ku de·angenga ine tom·bagipa manderangna ua u·iataha.
Mahendraganj Constituency gimiko dingtang dingtang rika cho·anirangko da·o dakenggipa aro namroroanina ja·ku de·anirangko ra·bana sienggiparangko MLA kan·dike talatangaha. Lekka poranina rika cho·aniko dakana agreba constituency-ni dingtang dingtang biaprango indoor stadium-rang aro mini stadium-rangko tariangna ua parakataha, jedakode chadambe manderangni gisepgriko dal·begipa namroroaniko tang·doatna aro kal·susaani a·bao chadamberangko didina man·gen ine ua aganaha.
Nokdonggaao dongpagipa sorkari official-rang lekka porani gamchatani bidingo agan-talatangaha. Raymond Zachary D. Shira, MCS, Additional Deputy Commissioner aro Project Director, DRDA, Ampati, gital nok building rikgipako matchotanina Kambakpara songni manderangna nama skaniko on·angaha aro bi·sarangna namgipa skie ra·aniko on·anganio namgipa gadangni rika cho·anirang mongsonggipa role ong·a ine ua aganangaha.
Chasong gitalni skul nokko rika cho·ani skiangani aro skie ra·anganiosan dingtanganiko ra·baa ong·ja indiba poraienggipa chatro chatrirangni ka·dongbatanniko bilakdapatan baksana nambata poria skianiko ra·angna man·a didiani gitaba ong·angaha, ine apsan dake Shri Emphul Ch. Marak, In-charge Sub-Divisional School Education Officer (SDSEO), Ampati, aganangaha.
Programme-ko Pamong Augustha R Marak-chi dilaha, Kambakpara Government LP School-ni Head teacher Salmendro A. Sangma-chi mittelpilskaaniko aganangaha. Sorkarini, joltangni dilgiparang aro songni manderangni on·gilaniko ua mande ra·e aganangaha jemangan project-ko be·en pilataha ine ua de·mittele aganangaha.
