AMPATI: South West Garo Hills a·jani Okkapara aro Rongkekgre songrango District Nutrition Leadership Program (DNLP)-ko ong·atanichi, ia jolrango donggipa sak 93 manderang namgnirangko man·rikaha.
Ia DNLP program-rangko ong·atanio, manderangni be·en bimangrangko porikka ra·e nian baksana an·seng baljoke dongani bidingo awareness program-rangkoba ong·atangaha.
Okkapara songo ia DNLP Health Camp-ko ong·atanio, sak 35 manderang, be·enni gita porikka ra·e nina cholrangko man·aha aro sabisi sakanchirangni gimin medical-ni manderang baksa agangrike ra·na man·aha.
Mukdangra Health & Wellness Centre-ni ning·o donggipa Rongkekgre songoba ia apsan program-ko ong·atangaha aro ia program-o gimik sak 58 manderang, dingtang dingtang sabisi sakanchirangna porikka ra·e nina cholrangko man·aha.
Ia program-ko ong·atanio medical dolni manderang, namgipa cha·ani ringani, an·seng baljoke janggi tangna nangani aro seng·gnang sabisi sakanchirangko porikka ra·e nina nangani gimin agan-talatanirangkoba on·angaha.
