NGH-o ma·mong aro a·dok sorkarirang baksa songgigrikgipa project-rangko chu·sokatchina BJP didia

SHILLONG: North Garo Hills a·jao ma·mong aro a·dok sorkarirang baksa songgigrikgipa dingtang dingtang project-rangko ta·raken chu·sokatchina gita Bristibar salo, a·dokni Bharatiya Janata Party (BJP) didiangaha.
Ia project-rangko BJP-ni state vice president aro Tura-ni MDC Bernard N Marak-ni dilanichi, ma·mong aro a·dok sorkarirang baksa soi ka·grikanio bak ong·pagipa manderang niangaha aro Marak-ni parakatani gitade uamang, North Garo Hills a·jani Resubelpara Community Health Centre (CHC) aro Mendipathar Community College-ni kamrangko niangaha. Uamangni ia biaprangko nieanio, North Garo Hills a·jani Assistant Commissioner-ba dongpaaha.
Marak-ni aganani gitade, Garo Hills-o lekka pora, an·seng baljokani, re·a doani aro dingtang dingtang kamrango namroro silroroaniko ra·bana songgigrikanirang dongani gimin ia kamrangko ma·mong aro a·dok sorkarirang baksa soi ka·anio dongpagipa manderang nieaha.
Tripartite Agreement ba dolgittam songgigrikani Para 2.4 ning·o North Garo Hills aro South West Garo Hills a·jako songan baksana gital sub-division aro development block-rangko songanichi, Garo Hills-o sorkarini kamrangko nambatatna man·aha.
Lekka porani kamrangko nipilangengon, dolgittamni songgigrikanio, Captain Williamson Sangma State University, Engineering College, Architecture College, Nursing College, Horticulture College aro Medical College baksana Garo Hills-o dingtang dingtang college aro institute-rangko kulianichi lekka porani gadangko namdapatna niksamsoanirang donga ine Marak parakataha.
Mendipathar Community College-ko niangengon, ia college-o chu·onga gita nokrang, skigiparang aro chatro chatrirangna seat-rangba chu·ongjaengani a·sel chatro chatrirang, gipin biaprangonasa re·ange poraina nangenga ine BJP-ni state vice president parakataha.
North Garo Hills a·jao higher education ba chubata gadangrango skie ra·aniko nambatatna gita Resubelpara, Bajengdoba aro Kharkutta-o community college-rangko kulichina gitaba, ia biaprangko niegipa dol didiangaha.
Kharkutta jolrango sorkarini kamrangko nambate ka·na man·na gita Kharkutta Block-ko Sub-Division-ona ra·doatchina gitaba ma·mong aro a·dok sorkarirang baksa songgigrikanio soi ka·grikgipa manderang didiangaha.
Resubelpara CHC-ko niangengon, ia health centre-o kam ka·giparang chu·ongkujaengani a·sel, manderangna sanna bananirangko on·anio neng·nikanirangko chagrongna nangenga ine Marak parakataha. Resubelpara-ni 100 bedded Civil Hospital-ko ia bilsini gisepon matchotatchina aro pilak department-rang chu·gimik kam ka·ani ja·mansa kulichina gitaba Tura MDC didiangaha.
North Garo Hills a·jao gital kuligipa block-rangni gimin janapatengon, ia gital block-rango gram sevak-rang chu·ongkujani a·sel sorkarini dingtang dingtang kamrangko ka·anio neng·nikanirangko man·enga ine ia pilak block-rangnan chu·onga gita gram sevak-rangko rakkichina BJP-ni state vice president didiangaha.