AMPATI: South West Garo Hills a·jani Kendrikona Jawahar Navodaya Vidyalaya (JNV)-o class VI-ni Jawahar Navodaya Vidyalaya Selection Test (JNVST) 2027-na da·o online admission-ko on·engaha aro admission-ko July 31 tarikona on·engani gimin dongimin tarikna skangan dorgastorangko galchina SWGH District Administration u·iataha.
India sorkarini Education Ministry ning·o donggipa Navodaya Vidyalaya Samiti-ni Commissioner-oni u·iataniko man·soani ja·man ia u·iataniko Kendrikona JNV-ni Principal in-charge, SWGH a·jani District Administration-na on·atskaaha.
JNV-rangara, changa sapani donggipa bi·sarangna, mongsongbate songadam nokadamrangni bi·sarangna indin dongchake poraina gita cholko on·aha aro ia skulrango, maming koros grian chatro chatrirangna dongchakani, lekka ki·taprang, uniform-rang aro pilak nanganirangkoba on·a.
Kendrikona JNV-ni Class VI-o admission ra·na gita JNVST 2027-ko November 28 tariko ong·atanggen ine u·iataha.
Gisiko nanggipa chatro chatrirang, JNVST 2027-na July 31 tariko ba una skangan, Navodaya Vidyalaya Samiti-ni website gita dorgastorangko galatna man·gen.
