TURA: 5th Basic Training Course-ko matchote kamo rimnapako man·gipa gital home guard-rangna Budbar salo, passing out parade-ko Tura-ni Agillanggre Field-o ong·atangaha aro ia program-ko ong·atanio, Shillong SDRF-ni Inspector General aro Civil Defence-ni Director Merinpole K Sangma, mongsonggipa sokgipa ong·e, parade-ko niangaha.
Ia passing out parade-ni mongsonggipa bak ‘Nishan Toli’ ceremony-koba Sangma niangaha.
Ia program-ko ong·atanio, Tura Home Guards-ni Divisional Commandant PT Sangma-ni dilanichi, kamo rimnapako man·gipa gital home guard-rang, ku·mikchetanikoba dakangaha.
Iani ja·man, training-o donggipa home guard-rang, march past ka·angaha aro training report-ko District Home Guards Commandant on·angskaaha.
Ia passing out parade-ko ong·atanio, dingtang dingtang official-rang, gital home guard-rangni nokdangrang aro jolo songdongenggipa manderangba bak ra·angtokaha.
Ia 5th Basic Training Course-ni physical training, drill performance aro gimikko man·gope chu·sokgipa home guard-rangna dingtangmancha boksisrangkoba on·angaha.
Ia passing out parade-ko ong·atanio Merinpole K Sangma, jinmana aganprakengon, an·tangtangko on·kange aro rakbee kamrangko ka·ahani gimin kamo rimnapa man·gipa gital home guard-rangna an·tangni namgipa skaniko on·angenba, Civil Defence-ni kamrangko agan-talate on·angaha. Ia training-o skie ra·gipa namgipa gunrangan home guard-rangni kam ka·anirango dilgen ineba Sangma aganaha. An·tangtangko on·kangani baksa mikkim gnange kamrango dangdike on·china gitaba ua gital home guard-rangko ku·pattiangaha.
