SHILLONG: Garo Hills Autonomous District Council (GHADC) election-rango Tribal ong·gijagipa manderangba bak ra·na bil donga aro Sixth Schedule-ko taridapkujaskalde darangba ia bilko ra·sekna man·jawa ine Phulbari-ni NPP MLA SG Esmatur Mominin parakataha.
GHADC election-rango Tribal ong·gijagipa manderangni bak ra·paaniko jegaltokengani gimin an·tangni ma·sianiko janapatengon, “Ian badiaba manderangni GHADC election-na skang politics kal·anisan ong·aia indiba a·songni niam bidikon Tribal ong·gijagipa manderangnaba bilko on·manaha,” ine Mominin parakataha.
Phulbari MLA-ni parakatani gitade, a·bachengonin gipin jatrangba GHADC election-rango bakko ra·paenga aro Sixth Schedule-ko taridapkujaskalde GHADC election-o Tribal ong·gijagipa manderangni bak ra·aniko champengna man·jawa.
“Sixth Schedule-o on·gimin niam gitade, a·jao bilsi 12-na songdonggimin manderangde dilgiparangko seokanio bakko ra·pana bilko man·aiaha,” ine Mominin talatangaha.
Constitution-ni Sixth Schedule-ko taridapkujaskalde darangba iani bidingo ma·sisretaniko ra·bana nangja ineba ua aganaha.
District council-rangara Tribal-rangko aro Tribal-rangna on·gimin bilko rakkina on·giminsa ong·a ine dingtang dingtang dolrang parakatenba, GHADC election-na skang gipin jatrangni bak ra·paaniko raken jegaltokahachim ine nikna man·a.