SHILLONG: A·doko Meghalaya Identification, Registration (Safety & Security) of Migrant Workers Act-ko sorkarini ra·gatataoni intal, a·dok gipinoni re·bae kam ka·na am·giparangni king 1,800-na batpilgipa dorgastorangko a·dok sorkari man·soaha.
Labour Department-ni Principal Secretary, GHP Raju-ni mija Bristibaro parakani gitade, a·dokni a·palchini Meghalayaona re·bae hajira ka·na am·giparangni king 1,813 dorgastorangko mija April 19 tarikona man·soaha. Indake sorkari uamangoni king 1,602 registration card-rangko on·aha aro dongspa sak 211-na registration card-rangko tarienga ineba ua aganaha.
Registration card-rangko tarie on·anio labour department gong 90,650 tangkarangko man·aha.
King 1,813 dorgastorangko man·sogipaoni, king 526-de East Khasi Hills-o, king 506 Ri Bhoi-o, king 211 West Garo Hills-o aro king 10-ko South West Khasi Hills-o man·soaha aro gipin district-rangoba bang·a bang·ja dake man·soaha. Aro uamangoni bang·batan online gita dorgasto galattokaha.
A·dokni a·palchini Meghalayaona re·bae kam ka·giparang sakantian uamangni bimingrangko labour department-o segattelna nanggen. Hajira ka·na re·bagiparang, online gita ong·jaoba offline gita district-tangtangni Labour Inspector office-o bimingrangko segatna nanggen.
Unigisepon, labour department-o biming segatgija gipinoni Meghalayaona re·bae kam ka·e cha·ako rim·a man·ode, Meghalaya Identification, Registration (Safety & Security) of Migrant Workers Act-o pangchake dai gamna nanggen ineba Raju agandapaha.
Indake hajira ka·e cha·giparangna uamangni bimingrangko online gita segatna man·na gita Deputy Chief Minister, Prestone Tynsong re·anggipa jao dingtangmancha online portal-koba a·bachengate on·manaha.
