TURA: Meghalaya a·doko aro Garo Hills-oba ta·raken COVID-19 giproroengahaoba, bilsi 45 badegimin manderangoni bang·batan hospital-rangona re·ange COVID-ni tikarangko su·tokjaengani gimin, tika su·kugijagipa manderangna cholko on·na gita da·al Sombar saloni a·bachenge salgittamna Health department-ni manderang, Tura jillani ning·o donggipa dingtang dingtang gittimrango tikarangko su·na a·bachengatengaha.
West Garo Hills a·jani Deputy Commissioner Ram Singh-ni u·iatani gitade, ia chango COVID-19 ta·rakbate giproroengoba aro namen kenbatgnigipa ong·engoba Tura jillao bilsi 45 badegimin manderangoni komibeoba sak 5500-mangni gita ia COVID tikarangko su·e ra·tokkujaengani gimin, tika su·kugijagipa manderangna cholko on·kuna gita dingtang dingtang gittimrango salprak ka·e tikarangko su·angenga.
Tikarangko da·al Sombar saloni Budbar salona dingtang dingtang gittimrango pring 8:00 bajioni attam 4:00 bajiona su·anggen aro tikarangko su·na gita gittimantion biaprangko donsomanaha.
Tikarangko su·e ra·na gita maming kenna nangani dongja ine talataniko on·angengon, donsogimin sal aro somoirango an·tangtangni sepangbatgipa vaccination centre-rangona re·ange tikarangko su·e ra·china gitaba Deputy Commissioner, Tura jillani bilsi 45 badegimin manderangko didiataha.
Tikarangko su·anio aro manderangko didianio joltangtangni COVID committee-rang dakchakanirangko on·anggen ineba ua parakataha.
Tikarangko su·na re·baengon, an·tangtangni Identity Card-rangko ra·e re·bachina gitaba DC mol·molataha.
