SHILLONG: Meghalaya a·doko tangka paisarangko jakkalsreta aro ong·gija kamrangko ka·a ine matnanganirangko ma·mong sorkarini gita jako ra·e sandirokatchina Congress dolni dilgipa Mukul Sangma didiangaha.
Tangka paisa jakkalsretani aro ong·gija dakanirangara autonomous district council (ADC)-rangosan ong·ja ine janapatengon, niam gri koela bikotani aro koela salruraanirangba a·dok damgni aro Bangladesh a·song baksa nangchapegipa simarangonaba sokangaha ine Sangma parakataha.
“Ong·gija dakanirangko aro tangka paisa jakkalsretaniko an·ching ta·raken bon·atna nangenga. Iarangara a·dokni dakna nanggni kamrangsan ong·aijaha aro India sorkarian jako ra·e kamko ka·na nangengaha,” ine Congress dolni dilgipa aganaha.
Niam gri koelarangko salruragipani bidingo janapatengon, “Iarangni bidingo Bangladesh a·songni media-rangba koborrangko sepilaha. Uni gimin ian a·dokosan ong·aigija sima ari jolrangrangonaba sokangengaha ine mesokani ong·enga,” ine Sangma parakataha.
GHADC-o BJP-ni membor, NPP-chi dilenggipa coalition-o bakko ra·paahani gimin janapatengon, “Pangnan talataniko on·china anga aganrongachim,” ine Sangma aganaha.
GHADC-o tangka jakkalsreta aro kamrangko ka·sreta ine matnanggipani bidingo maini gimin BJP dol, jakgitele am·sandiatna man·jaha ineba ua sing·doangaha.
“Uamang (BJP)-ba a·dok sorkario bak ong·paenggiparang ong·a indiba ma·mong sorkaride BJP sorkarian ong·achim indide maini gimin uamang iani bidingo sinjetaniko dakna man·jaha?” ine Congress dolni dilgipa aro Opposition dolni dilgipa sing·doangaha.