NEW DELHI/SHILLONG: Indiani bang·a a·dokrangon COVID-19 sagiparangko sanna gita Oxygen nanganirango neng·nikanirangko chagrongengon, indakgipa apsan neng·nikanirangoniko chel·chak naljokatna man·na gita Meghalayao damgittam Oxygen Generation Plant-rangko dongen ine koboro parakataha.
Ia damgittam Oxygen Generation Plant-rangoniko East Khasi Hills district-o damsa, undake West Jaintia Hills district aro West Garo Hills district-rango damprak dake donanggen.
A·songni public health facility-rango dam 551 Pressure Swing Adsorption (PSA) Medical Oxygen Generation Plant-rangko donna gita PM CARES Fund-oniko tangka paisarangko chamanaha. Indake public health system-rangko bilakbatatna man·na gita district headquarter-rango donggipa sorkarini hospitalrango ia PSA Oxygen Generation Plant-rangko donna gita sorkari miksonge re·chakataha, jedakode hospitalrango chu·onga gita oxygen-rang donggen, koboro parakataha.
A·songo uandake a·dokrango Covid-19 sagiparangna aro gipin sagiparangna nanggitikao chu·onga gita oxygen-rangko on·na man·na gita aro sorkari hospitalrango oxygen-rangko bon·changatjana gita Sorkari ia Oxygen Generation Plant-rangko donnatna tik ka·aha.
Unomitingo Meghalaya Chief Minister Conrad K Sangma, Sombar salo Ri-Bhoi district-ni oxygen plant-ko re·ange nieaha.
‘‘Oxygen plant-o kam ka·enganirangko nirokna aroba oxygen-na neng·nikanirangko chagrongaona maikae tarisoenga uko sandina gita re·angaha,’’ Pa Sangma aganaha.
Byrnihat-o donggipa oxygen plant unit salprako 2000 cubic meter oxygen-ko tarienga.
