TURA: East Garo Hills a·jao jako ra·e ka·enggipa dingtang dingtang sorkarini scheme-rangko nipiltaina gita Sombar salo, Tura-ni MP Agatha K Sangma-ni dilanichi District Development Coordination & Monitoring Committee (DISHA)-ni tom·aniko Williamnagar Circuit House-o ong·atangaha.
Ma·mong sorkarini ra·gatgipa dingtang dingtang scheme-rang, jekai PMAY(G), MGNREGS, Jal Jeevan Mission, National Health Mission, PMMVY, SSA, ICDS, Poshan Abhiyan, PM-KISAN, PMGSY aro uandakgipa dingtang dingtang scheme-rangko ia tom·anio Tura-ni MP nipilangaha.
Ia tom·aniko East Garo Hills a·jani Deputy Commissioner Swapnil Tembe dilangengon, DISHA-ni tom·aniko ong·atani bidingo jinmana talatangenba, East Garo Hills a·jao dingtang dingtang department-ni gita jako ra·e ka·enggipa kamrangni bidingo Tura-ni MP-na talate on·angaha.
Ia tom·anio East Garo Hills DRDA-ni Project Director L Ch Marak-ba jinmana aganprakengon, East Garo Hills a·jani dingtang dingtang C&RD block-rangko kam ka·enggipa dingtang dingtang scheme-rangko chu·sokatani bidingo aro chu·sokatna nisan donenggipani bidingo talate on·angskaaha.
Iana skang, public hearing-koba Williamnagar circuit house-o Samanda C&RD Block-ni BDO Albert G Momin-ni dilanichi ong·atangaha aro ia public hearing-o Tura-ni MP Agatha K Sangma-ba dongpae bak ra·angaha. Ia public hearing-ko ong·atanio dingtang dingtang village employment council (VEC)-rang, an·tangtangni chagrongna nangenggipa dingtang dingtang neng·nikanirangko BDO-na aro Tura-ni MP-na badi ka·doangtokaha.
Ia tom·anio Tura-ni MP Agatha Sangma-ba jinmana aganprakangengon, ma·mong sorkarini ra·gatenggipa dingtang dingtang scheme-rangko name nirokengani gimin East Garo Hills a·jani Deputy Commissioner-ko mittelpilangaha aro dingtang dingtang VEC-rangni man·enggipa neng·nikanirangko niatna gita ku·rachakaniko on·angaha.
