SHILLONG: Meghalaya Governor Satya Pal Malik, Chief Minister Conrad Sangma aro Health Minister A L Hek mangko mijalo grongenba COVID-19 sabisi sajinmani bidingo chanchirimaniko dakangaha.
Tom·anio, Dr Amar Warr , DHS MI aro Mission Director NHM Ramkumar mangba dongpaaha, jean tom·anio che·em che·em dake talate on·angaha.
Meghalaya Chief Minister Conrad Sangma, a·doko ong·enggipa COVID-19 sabisini obostarangni bidingo, COVID-19 sagiparangna palangrangko, ICU palarangko aro oxygen facility-rangko tarisoani bidingo Governor-na talate on·aha.
Unagreba, Covid sabisini ta·rake jelrikrikaniko champengna a·dok sorkari aro Health Department-ni gita bakrime kam ka·enggipani bidingoba chief minister, Governor-na agane on·aha.
Meghalayao da·o dipet sak 1,456 active case-rang donga, batanggimin ja gittamoniko nigrikatgenchimode Covid sabisi da·o ta·rakbate jelrikrikenga, quarantine dakani aro noko donge sangiparangko nirokani niamrangko dakani bidingoba tom·anio u·iataniko on·aha.
Da·o active case-o ong·gipa sak 1,456-oni sak 1,200 de bilsi 45-na komibatgiparang ong·a, sabisiko sason man·ani cholde uan Covid tikako su·achisan ong·aigen ineba tom·ani janapaha.
Indakeba u·iataha je da·omitingode a·doko chu·onga gita covid tikarang donga, indake nanggitik sokgitikaona ge 65 mang ICU palangrang ge 700 mang oxygen gnanggipa palangrang donga.
Sorkari, COVID sabisina simsakaniko mamingdakeba olgrokatja, da·omangba test ka·ani aro tika su·aniko dingchiken dakenga, Chief Minister aganaha.
Unomitingo, sorkarini kam ka·anirangna chu·ongnikaniko parakana baksa tikarangko gisiko nange su·china aro tikani bidingo manderangna ma·siate on·china gita Governor ku·pattiaha.
