Shillong: COVID-19 sabisiko dakgrikchakna gita je cholrangkoba ra·gate kam ka·aichina gita Meghalaya Sorkari, National Health Mission (NHM) aro Directorate of Health Services (DHS)-na bilko on·aha.
Indake ong·engon, Sorkarini bil on·anina sengchaaigija mitam nangchongmotgipa kamrangko ka·ataichina gitaba DHS aro NHM-na bilko on·na gita Chief Minister Conrad Sangmani tom·e chanchidilanio tik ka·aha ine A·dokni Health aro Family Welfare Minister, Alexander Laloo Hek aganaha.
‘‘COVID-19 sabisiko dakgrikchakanio, jedakgipa kamoba ong·chong, nangchongmotenga ine nikode uandakgipa kamrangko ka·ataichina gitaba NHM aro DHS-na bilko on·e donaha’’ ine Hek, Mongolbaro koborni manderangna aganaha.
