SHILLONG: Bilsi 18-44 ong·gipa manderangko mijaloni Covid tika su·chakatanio namen chu·sokgipa ong·aha, jeon tika su·na biming segatgiparangoni 99 percent manderang mijalo tika su·e ra·tokaha, aro Sorkarini ja·ku de·chakatani namen bite gnanggipa ong·aha.
Bilsi 18 batgiparangko Sorkari, mijaloni Covid tika su·chakataha. Tika su·na biling segatgipa sak 1950-ni sak 1907 manderang mijal attam 8 bajiona Covid tikarangko su·angaha.
Bilsi 18 batgiparangni tika su·na gita gisiko nanganiko mesokaniara, A·dok Sorkarina namgipa aganchakani gita ong·aha, jeon bilsi 45 batgiparangni tika su·na gita gisiko nangtokjani gimin Sorkari suk ong·gijaniko parakengachim.
Tika su·nagiparangna, uamangni bimingrangko segatna gita ia Robibaroni chol on·angtaigen, jemangan tika su·na sike dongenga, uamang uamangni bimingrangko Cowin website-o segatna man·gen.
Unomitingo skanggipa Covid tikako su·ani ja·mano gnigipa tikako su·taina gita somoi dongiminko anti 12-16-ona bariataha.
Unomitingo an·tangtangko aro saksa sakgipinni janggirangko naljokatna gita COVD tikarangko su·e ra·tokchina gita Sorkari, changni chang a·dokni manderangko mol·molaha.
