TURA: Bajengdoba-ni Bakenang Songma-o donggipa 24-Bolsong GHADC constituency-ni MDC Crozier G Momin-ni nokdango sak 11 manderang, COVID-19-na porikka ra·anio positive ong·ahani gimin uni nokko aro uni nokni wilwila gimikkon micro containment zone dakataha ine North Garo Hills a·jani Deputy Commissioner u·iataha.
North Garo Hills a·jani Deputy Commissioner RP Marak-ni u·iatani gitade, Crozier Momin saksa MDC ong·ani gimin noksulrangoni aro ua jolrangoni bang·a manderangan uni nokona re·ange uni nokdangni manderangko grongengnaba gnang ine nikenba, contact tracing-ko dakna gita uni nokko micro containment zone dakataha.
“Uni nokko containment zone dakengmiting somoio nokdangni manderang nokoni ong·kate gipinrangko grongna man·jawa aro uni nokonaba doctor aro medical-o kam ka·giparangna agrede darangkoba re·angna on·jawa,” ine Deputy Commissioner parakataha.
Indake ong·engon, medical-ni manderang name kamrangko ka·na man·na gita Bakenang Songma jolgimikkon salbongana containment zone dakataha ineba official-rang parakataha.
