SHILLONG: Ia sal somoirango COVID-19 giproroengani a·sel kenchakna nanganirang ong·engani gimin sorkari office-rango kam ka·e an·o donggipa me·chikrangko aro be·enni gita cholgri ong·gipa manderangkode kamoniko watna tik ka·aha ine Personnel department-oni u·iataha.
Meghalaya a·dokoba ta·raken COVID-19 batrikrikengani gimin lockdown-ko ra·gatengon, an·o donggipa me·chikrangkode iandakgipa obostao kamrangko ka·atjachina gita adita salrangna skangsan, Hynniewtrep Integrated Territorial Organisation (HITO), a·dokni Deputy Chief Minister Prestone Tynsong-na sedoatahachim.
Indake ong·engon, re·anggipa bilsioba COVID-19 giproroani somoio an·o donggipa me·chikrang aro be·enni gita cholgri ong·gipa manderangkode kamrangoniko watahani gimin ia changoba an·o donggipa me·chikrangko aro be·enni gita cholgri ong·gipa manderangko office-rangona re·bajachina sorkari ge·etaniko on·ataha.
Indake ong·genchimoba, an·o donggipa me·chikrang aro be·enni gita cholgri ong·gipa manderang, noktangtangoni kamrangko ka·atskana nanggen aro nanggitikan somoirangoba office-o man·na nanggen ine sorkari u·iataniko on·ataha.
