SHILLONG: Meghalaya a·doko oxygen-rang bon·changjana gita a·dok sorkari, dingtang dingtang biaprango damdok oxygen plant-rangko kulina kamrangko ka·engaha.
Sukrobar salo Health Services-ni Director Dr Aman War-ni parakatani gitade, Delhi-oniko sildorengo ra·baenggipa oxygen plant, Guwahati airport-ona sokbaaha aro da·o ia plant-ko Shillong songjinmani RP Chest Hospital-ona ra·baengaha.
“Ia oxygen plant sokbahaon chinga Sonibar saloni ia plant-ko chatgenok aro mikkang anti dipetde ia oxygen plant-ko jakkalna man·gnok,” ine Dr War parakataha.
Shillong civil hospital-o kulina sienggipa oxygen plant-ni gimin janapatengon, ia hospital-o minute-prako litre 600 chipna man·gipa dal·gipa oxygen plant-ko May 25 tariko Delhi-oniko ra·baskagen ine Dr War parakataha.
Ia oxygen plant sokbakuja dipet Shillong civil hospital-o oxygen-ko nangbatengani gimin sorkari, minute-prako litre 45 chipna man·gipa ge 6 generator-rangko donatskaaha ineba Dr War parakataha.
“Ia oxygen plant-ko chate Sombar salonin jakkalengaha aro ia plant-chi chinga ge 25 palangrangna chu·onga gitan oxygen-ko jakkalna man·enga,” ine Health Services-ni Director parakataha.
Dr War-ni parakatani gitade, Nongpoh-onaba ostrorang sokbaahani gimin oxygen plant-ko chatengaha aro bakan ia biapoba oxygen plant-ko jakkalna man·gnok.
Shillong songjinmani Umsawli-o kulina sienggipa damgni cryogenic oxygen plant-rangni gimin janapatskaengon, ia plant-rangko June 15 tarik dipet a·bachengna ka·dongenga ine Dr War parakataha.
Indake ong·engon, Jengjal-oba 20 KL-ni cryogenic oxygen plant-ko kulina siengani gimin ia tank-rang antignini gisepon sokbanaba gnang ine Health official parakataha.
“Jengjal-oba biaprangko tarisoengaha aro ia oxygen plant-ko kuliahaode salprako ge 2000 cylinder-rango chipna man·gnok,” ine Dr War parakataha.
Re·anggipa Bristibar salosan a·dokni Chief Minister Conrad K Sangma, Jengjal-ona re·angenba, cryogenic oxygen plant kulina sienggipa biapko nieahachim.
